Бо хүн – август 22-де – Россияның Күрүне тугунуң хүнүн демдеглеп эрттирип турар бис. Шак бо онзагай хүн-биле байыр чедирген чылыг сөстерни Тываның Баштыңы Владислав Ховалыг бодунуң социал четкилеринге бижээн:
“Хүндүлүг чаңгыс чер-чурттугларым!
Россияның Күрүне тугунуң хүнү-биле силер бүгүдеге байыр чедирип тур мен!
Шак бо тураскаалдыг байырлал хүнүнде бистиң күрүневистиң кол сүлде демдектериниң бирээзинге ханы хүндүткеливисти илередип турарывыс бо. Бистиң тугувус – бай-байлак төөгүлүг болгаш чүс-чүс чылдар-биле санаттынар чаагай езу-чаңчылдарлыг өндүр бедик чуртувустуң сүлде демдээ, чонувустуң эп-сеткилдииниң болгаш сагыш-сеткилиниң чаңгыс аай болуп турарының илередикчизи.
Россияда янзы-бүрү омак-сөөктүг болгаш шажын-чүдүлгелиг сая-сая кижилер амыдырап-чурттап, ажылдап турар. Бисти Төрээн чуртувуска ынакшыл биле ону улам күчү-күштүг болгаш сайзыраңгай болдуруксаан изиг күзеливис каттыштырып турар.
Эгээртинмес кызыгаарлыг улуг чуртувустуң хамаатылары, бистиң шуптувуска каң дег кадыкшылды, чаагай чорукту база бурунгаар бүзүрелдиг көрүштү, улуг Россия чуртувустуң чырык келир үези дээш чедиишкиннерни күзеп тур мен!