Россия Федерациязында ча спордунуң чедиишкинниг сайзырап турар девискээрлерниң бирээзи – Тыва. Ооң херечизи чадан кара адарының Россия чергелиг маргылдааларны Тыва Республикага эрттирип турар апарганы. Тыва спортчулар чаа адарынга Россия болгаш делегей чергелиг маргылдааларга удаа-дараа киржип, аңаа тиилелгелерни чедип ап, бедик шаңналдарны чаалап ап турар. 2012 чылда Паралимпий оюннарынга Михаил Оюн хүлер медальды ойнап алган, Елена Достай ча спортунга Россияның, Европаның чемпиону.
Бисте ындыг бедик мергежилдиг, делегей чергелиг ат-алдарлыг спортчулар бары – Тывага Россия деңнелдиг маргылдааларның эрттирип турарының бир чылдагааны. Ча адарынга Россияның чемпионадын 2024 чылда эрттирген. Ол маргылдаага Россия Федерациязының 24 регионнарындан 200 ажыг спортчулар киришкен.
Россияның Кубогу дээш бо чылдың июль 28-тен август 2-ге чедир Тываның найысылалы Кызыл хоорайга эрткен маргылдаага барык 400 хире ча адыкчылары келир боор деп маргылдааның организакчылары манап турган. Ынчалза-даа янзы-бүрү чылдагааннар-биле 14 региондан 150 ажыг спортчулар бо чылда Россияның Кубогу дээш маргылдаага киржип келген. Ча спортунга эксперттерниң хайгааралы-биле алырга, Россияның Кубогу дээш Тывага маргылдаага чурттуң эң шыырак спортчулары болгаш командалары киржир боорга, РФ-тиң чамдык регионнарының ча адыкчылары киришпес деп шиитпирлээн хире. Чадан кара адарынга Россияның эң шыырак командаларының бирээзи Москваның командазының кежигүнү Виктория Нагорнаяның: “Россияның Кубогу дээш маргылдаага Россияның эң шыырак командалары келген-дир. Олар дээрге Бурятияның, Забайкалье крайның болгаш Москва хоорайның командалары» – деп чугаалааны аңаа бадыткал.
Кызылда Совет Тываның 5 чылы аттыг стадионга 3 хонук дургузунда маргылдаага ча адыкчылары 70 метр ырак черге классиктиг чадан, а 50 метр дистанцияга блоктуг (күштелдирер тургузуглуг) чадан кара адарынга мөөрейлешкен. Россияның Кубогу дээш маргылдаага тиилээн ча адыкчылары Россияның чыынды командазының кежигүнүнге кордакчылар боор, ол ышкаш делегей чергелиг маргылдааларже оларның оруу ажык апаар.
Москваның командазының кежигүнү Виктория Нагорнаяның чугаалааны ышкаш, Москваның командазы тергиидээн, Бурятия биле Забайкалье крайның командалары ийиги болгаш үшкү шаңналдыг черлерни чаалап алганнар.
Ш. КҮЖҮГЕТ белеткээн.
Буян ООРЖАКТЫҢ тырттырган чуруктары.
“Шын” № 30 2025 чылдың август 7