Кызылдың аэропортунга, Россияның Маадыры Найыр Кыргысты байырлыы-биле уткуп алган. Чаңгыс чер чурттуглары, шериг албанын кады эрттирген эш-өөрү, өг-бүлези, эш-өөрү база чоок кижилери күрүнениң бедик шаңналын алган эрес-дидим маадырга байыр чедирер дээш чыглып келгеннер. Республика Чазааның Даргазының оралакчызы Шолбан Сендаш база Россияның маадырлары Мерген Донгак, Буян Куулар, Чалым Чүлдүм-оол олар Маадырга база ооң өг-бүлезинге байырын чедиргеннер.
«Силерниң коргуш чок эрес-дидимиңер, быжыг туружуңар болгаш хүлээлгеңерге бердинген чорууңар эң-не ханы хүндүткелди болгаш магадалды болдурган. Россияның болгаш ооң хамаатыларының сонуургалдарын камгалап, хүлээлгеңерни алдарлыы-биле күүсеткен силер. Силерге шыдамык чорукту, быжыг кадыкшылды, чедиишкиннерни, хей-аътты болгаш чоок кижилериңерниң деткимчезин күзедивис! Россияның Маадыры деп бедик шаңналды алганыңар-биле байыр чедирип тур бис» – деп, Чазак Даргазының оралакчызы дайынчының ада-иези Байлак биле Эдуард Кыргыстарга өөрүп четтиргенин илереткен.
Тываның Баштыңы Владислав Ховалыг МАХ-та бодунуң каналынга Найыр-биле февраль 23-те Москвага ужурашканын демдеглээн: «Ада-иези-биле ужуражылга эң сүрээденчиг болду. Ынчан безин ооң биче сеткилдии болгаш шилип алган херээнге бердингенин магадап ханмадым. Бөгүн ону төрээн черинге көөрү – бүгү Тывага канчаар-даа аажок улуг өөрүшкү-дүр»– деп, регионнуң удуртукчузу бижээн.
Маадырның авазы Байлак Кыргыс оглу бичиизинде-ле коргуш чок, шиитпирлиг чораанын чугаалаан. «Ол бергелерден кажан-даа кортпас, кошкак улус дээш кезээде туржур кижи. Школага идепкейлиг, спортчу, хөккейниң шыырак ойнакчызы чораан. Бир эвес Төрээн чурту кыйгыртыр болза, ол ынаар чоруптар деп чүвени иштимде билип турган мен. Эгезинде ол биске керээ дугайында чугаалаваан, бисти дүвүретпес бодаан хевирлиг. Ынчалза-даа удаваанда шуптузун чугаалаан кижи. Хөлзеп, сагышсырап турганывыс шын» – деп, Маадырның авазы чугаалаан.
Тускай шериг операциязының үезинде Тывадан Россияның Маадыры деп атка төлептиг болган дөрт дугаар кижи Найыр Кыргыс болган. Россияның Президентизи Владимир Путинниң чарлыы-биле Алдын Сылдысты ол Ада-чурт камгалакчызының хүнүнүң бүдүүзүнде Россияның камгалал сайыды Андрей Белоусов маадырга тывыскан.
Төрээн республиказынга байырлыг уткуушкун Найыр Кыргыска ёзулуг чылыг болгаш уттундурбас болуушкун болган. «Бо бистиң шуптувустуң шаңналывыс-тыр. Манап чорууруңар дээш, чылыг чымчак хүлээп алганыңар дээш четтирдим. Ол меңээ күштү берип туру» — деп, ол чаңгыс чер чурттугларынга чугаалаан.
А. МОНГУШ.
Ада ТЮЛЮШТУҢ тырттырган чуруктары.
“Шын” №8 2026 чылдың март 5