Россияның «Билиг» ниитилелиниң лекторлары «Кезээде бир дугаарында: Россияның херээженнери төөгүнү канчаар өскерткенил?» деп өөредилгелиг каш лекцияларны аныяктарга номчаан. Студентилер, ажылчын аныяктар, школачылар, тускай шериг операциязының хоочуннарының өг-бүле кежигүннери ооң дыңнакчылары болган.
Тываның күрүне университединге, республиканың эмчи колледжизинге база көдээ ажыл-агый техникумунга лекциялар эрткен. «Билиг» ниитилелиниң лекторлары российжи херээженнерниң эртемде, өөредилгеде, хөй-ниити ажыл-чорудулгазында чедиишкиннерин таныштырган.
Чижээ, Тываның күрүне университединиң башкызы Екатерина Киселева бодунуң илеткелин улуг ажыдыышкыннарны эгелээн херээжен чонга тураскааткан. Дыңнакчылар Россияга бирги херээжен эртемденнерниң амыдырал-чуртталгазын, эртем-биле ажылдаар эрге дээш оларның демисежип чораанын, оларның үлегер-чижээ амгы салгалдың херээжен эртемденнеринге канчаар сорукту кииргенин билип алганнар.
Тываның көдээ ажыл-агый техникумунуң башкызы Алена Ооржак аграрлыг адыр таварыштыр теманы ажыткан. Чурттуң аъш-чем талазы-биле айыыл чок чоруун хандырган алдарлыг херээжен агрономнарны, ажыл-агыйлар удуртукчуларын болгаш эртемден-селекционерлер дугайында бодунуң лекциязынга таныштырган.
Тываның биосферлиг шинчилелдер төвүнүң улуг төлээзи Чинчи Монгуш делегей дугайында билиглерниң кызыгаарларын делгемчиткен экспедициялар болгаш шинчилелдерлиг орус аян-чорукчуларның, геологтарның, биологтарның дугайында сонуургаткан.
«Билиг» российжи ниитилелдиң Тывада салбырының директору Эмина Кызыл-оол регионнуң школаларында болгаш техникумнарында Бүгү-делегейниң херээженнер хүнүнге тураскааткан чырыдыышкын ужуражылгаларын чугаалаан.
«Эрткен төөгүге болгаш өг-бүлениң үндезин үнелиг чүүлдеринге хүндүткелди кижизидери – Россияның «Билиг» ниитилелиниң чырыдыышкын хемчеглериниң кол сорулгазы. Лекторлар школачылар болгаш студентилер-биле билдингир чаңгыс чер чурттугларының үлегерлерин сайгарып чугаалажып турары солун. Ылаңгыя херээжен чоннуң анаа-ла допчу-намдарындан барымдаалар эвес, а эртемге болгаш чуртунга бараан болуп тура, өг-бүлезинге болгаш мергежилинге бодун көргүскен төөгүлери аныяктарга улуг сонуургалды болдуруп турар» – деп, Эмина Кызыл-оол демдеглээн.
Россияның «Билиг» ниитилели Бүгү-делегейниң херээженнер хүнүнге тураскааткан лекцияларны бүгү чуртта эрттирип турарын демдеглезе чогуур. «Кезээде бир дугаарында: Россияның херээженнери төөгүнү канчаар өскерткенил» база «Херээженнер дайында болгаш тылда» деп өөредиглиг лекциялар дузазы-биле чурттуң хөгжүлдезинге үнелеп четпес үлүг-хуузун киирген херээженнерниң чедиишкиннериниң дугайында темалыг хемчеглерни күзелдиг кижи бүрүзү эрттирип болур.
/ Бистиң корр.
Медээ болгаш чурукту интернеттен алган.
“Шын” №9 2026 чылдың март 12