Российжи күрүне компаниязы «Ростехтиң» ажыл-чорудулгазы хөй угланыышкынныг. 2007 чылда тургустунган бо компания бедик технологияларга эртем-шинчилел ажылдарын чорударындан бедик технологиялар-биле продукция бүдүреринге чедир дээш өске-даа адырларда ажылдап турар.
Чүгле Сибирь федералдыг округта «Ростех» күрүне компаниязының дөртен ажыг бүдүрүлгелери ажыл-чорудулгазын боттандырып чорудуп турар. Ол бүдүрүлгелерде 60 муң ажыг кижи хаара туттунган. «Ростех» күрүне компаниязының «Техмашсервис» компаниязы частыр бүдүмелдер бүдүрүп үндүрер бүдүрүлгени эрткен чылда Тывага ажыглалга киирген. Бо улуг күрүне компаниязының «Эльбрусметалл-Литий» компаниязы Эрзин кожуунда литий курлавырын болбаазырадып ажыглаарының дугуржулгазын Тыва Республиканың Чазаа-биле чарган. 2023 чылда «Эльбрусметалл-Литий» Тывага бүрүткеткеш, ажыл-чорудулгазын эгелээн.
Сибирь федералдыг округта «Ростех» күрүне компаниязының бүдүрүлгелеринде кадрлар чедишпези — шиитпирлээри нарын айтырыг. 2024 чылдың эгезинде компанияның бүдүрүлгелеринге 17 муң ажылчынны хүлээп алырга-даа, кадрлар-биле бүдүрүлгелер долу четчелеттинмээн. Бедик мергежилдиг ажылчыннар дыка херек болуп турар.
«Ростех» күрүне компаниязының бүдүрүлгелеринге бедик мергежилдиг ажылчын кадрларны белеткээр талазы-биле чөвүлел хуралды Россия Федерациязының Президентизиниң Сибирь федералдыг округта бүрүн эргелиг төлээзи Анатолий Серышев эрттирген. Чөвүлел хурал видеоконференция хевиринге болган.
Чөвүлел хуралга «Ростех» күрүне компаниязының чиңгине директорунуң оралакчызы, Россияның машина тудугжуларының эвилелиниң бюро кежигүнү Николай Волобуев, Россия Федерациязының Өөредилге яамызының ортумак профессионал билигге болгаш өөредилге адырынга күрүне политиказының департаментизиниң директору Виктор Неумывакин, Сибирь федералдыг округта эрге-чагырга органнарының төлээлери, Сибирьниң регионнарында ортумак профессионал өөредилге албан черлериниң удуртукчулары киришкен.
Анатолий Серышев чөвүлел хуралды ажыдып тура, российжи күрүнениң моон соңгаар хамаарышпас хөгжүлдезинге үлетпүрге бедик мергежилдиг ажылчын кадрларны белеткээри чугула апарганын сөөлгү үеде болуушкуннар көргүскен деп демдеглээн.
Сибирь федералдыг округтуң кол сорулгалары «Профессионалитет» деп федералдыг төлевилелге Сибирьниң ортумак профессионал өөредилге черлериниң идепкейлиг киржири, профессионал өөредилге черлериниң өөредилге-методиктиг баазазын чаартыры, башкыларның эртем-билииниң деңнелин көдүрери деп чөвүлел хуралдың киржикчилери айытканнар.
Ажылчын профессионал өөредилге адырынга хамаарыштыр хоойлу-дүрүмнү улам сайзыраңгайжыдарынче, ажылчын кадрларны эчис сорулгалыг угланыышкыннарга белеткээринче күрүне шыңгыы кичээнгейни салырының эргежок чугулазын чөвүлел хуралдың киржикчилери демдеглээннер.
Ш. МОҢГУШ белеткээн.
Чурукту интернет четкизинден хоолгалаан.
«Шын» №79 2024 чылдың октябрь 16