Рождество - Тывада

Бөгүн, Январь 7-де, православ шажын чүдүкчүлериниң кол байырлалы- Рождествога тураскааткан мөргүл номчулгазы Кызылдың Воскресенск дуганынга эрткен. Аңаа улуг- биче чүдүкчүлер кээп, чула кыпсып, ыдыктыг байырлал-биле бот-боттарынга быжыг кадыкшылды, аас-кежикти, тайбыңны күзээннер.

Кызылдың чурттакчызы, Сергей (43 харлыг):

- Чылдың-на бо байырлалда маңаа чула салып, чоок улузумга, ал бодумга быжыг кадыкшылды бургандан дилеп кээп турар мен. Кызылга төрүттүнгеш, өскен мен. Православ шажынның тускай езулалы-биле чажымда-ла ада-ием мени бо шажынче киирген. Ханы чүдүкчү эвес-даа болзумза, кол ёзулалдарны эрттирбезин кызар чордум.Бо чылын бир дугаарында, ТШО-да киржип турар бистиң дайынчыларывыска болгаш ам чоруур деп турар оолдарга шуптузунга быжыг кадыкшылды, онча-менди чанып кээрин, айыыл-халап оларны оюп чоруур болзуанам деп тейлеп, чула кывыстым. Бис мында байырлап турувуста, ында оолдар төрээн чурт дээш тура-соруктуг тутчуп турар болгай.Бодум 43 харлыг мен. Келдире бээр болза, чоруурунга шагда-ла белен мен. Бүгү чонга Рождество-биле байыр чедирдим!

Кызылдың чурттакчызы, Ярослав (14 харлыг):

- Бичиивистен тура Рождествода албан-на хүрээге кээр чаңчылдыг бис. Чүге дээрге бургандан бо хүнде бүгү кижилерге эки болзун дээш
дилеп, чула кыпсырга, күштүг болур. Бо удаада, делегейге тайбың делгерээр болзун деп күзээшкинни кылдывыс.

Кызылдың епархиязының хөй-ниити-биле харылзаа тудар килдизиниң удуртукчузу, иеромонах Амвросий (Громов):

- Православ шажынның бүгү байырлалдарының кол утказы муң-муң чылдар дургузунда кажан-даа өскерлип көрбээн. Рождество- өөрүшкүлүг, амыр-менди чуртталга келир дээрзинге идегелди берип турар байырлал. Амгы үеде болуп турар болуушкуннарга хамаарыштыр чугаалаар болза, эки үеге, эки сеткилге, тайбың чорукка идегелди оттурары-биле орус Православ хүрээниң Епискову Патриарх Кирилл Украинада болуп турар ТШО-ның киржикчилеринден Рождество байырлалдарының үезинде от ажыдарын январь 6,7 хүннеринде соксадыр дилегни киирген.
Рождествода ядыы-ядамык, түреп чоруур чонга ачы-дуза чедирери, аарыг улуска дузалажыры, бодунуң өөрүшкүзү-биле үлежири - база бир албан-на кылыр ужурлуг чаңчылдарның бирээзи.
Чүгле чоок кижиңге эки хамаарылгалыг болурундан аңгыда, көңгүс танывазың кижиге эки сеткилди илередип, өөрүшкү оттурар чүүлдү кылырынче Рождество байырлалы кыйгырып турар.
Рождествода эң-не кол чүүл -бир дугаарында, тайбың дээрни, кижи бүрүзү эки сеткилге чагыртып чоруурун, ол ышкаш идегелди, ынакшылды, кадыкшылды күзээр -дир мен.

К.Монгуш
Чуруктар Ада Тюлюштүң болгаш авторнуу