48 кижи хораннанган, оларның тозу нарын байдалга турган, 25 кижи чок болган – ол дээрге бир чылдың дургузунда угарлыг газтан озал-ондактарга хамаарышкан көргүзүглер. Ол чыт болгаш өң чок айыылдыг газты кижи 10 минутаның дургузунда тынгаш, амы-тынындан чарлып болур.
Угарлыг газтан хораннангаш, эмнелгеже нарын байдалда кирген кижилерниң амы-тынын анестезиолог-реаниматолог эмчи Буян Моңгуш камгалап, ынчангаш чурттакчыларны оваарымчалыг болурунче кыйгырып турар.
“Угарлыг газтан хораннанган кижилерни ол-ла дораан өкпени арыглаар дериг-херекселге кожуптар бис. Чамдык таварылгаларда дузалажып шыдавайн баар-дыр бис. Удуп чыткаш, газты тынгаш, олчаан "улуг уйгу-биле" удуй берип болур. Ынчангаш ону болдурбазы чугула. Бажыңын суугу-биле одап турар кижи бүрүзү профилактиктиг хемчеглерни баш удур чорудар ужурлуг. Хай-халапка кым-даа таваржы берип болур бол-гай” – деп, анестезиолог-реаниматолог эмчи Буян Моңгуш кичээндирген.
Болганчок-ла угарлыг газты «чыды чок өлүрүкчү» деп база адап турар, чүге дизе ону тускай херекселдер чокта илередири болдунмас. Кижилерге ооң оран-савада бары барык билдинмес, угарлыг газ тодараттынмас. Агаар-биле холушкаш, ол хөлчок дүрген тараар, өлүмнүг шынарын белен-селен ышкынмас. Кижи суларап, уйгузу кээр, тыныштаар апаар.
Угарлыг газтың мөөңнелип чыглырының кол чылдагаа- ны – төндүр кыппаан оттулар чүүлден угарлыг газ тыптыры.
Хөй кезии хоранналыышкын үрелип сандараан суугудан азы өрттүң чалымындан болур. Ол ышкаш хааглыг оран-сава иштинге ажылдап турар автомобиль турда, угарлыг газ тыптыр.
Өрт медээчизи угарлыг газтан кижиниң амы-тынын камгалаптар. Ону салдырып алгаш, дыштыг удуп болур.
Олча ОНДАР.
Чурукту интернет четкизинден хоолгалаан.
«Шын» №4 2025 чылдың февраль 6