Тывада социал айыылдыг байдалда өг-бүлелерниң бажыңнарында өрт медээчилерин хынаары-биле рейдилерни чорудар. Республиканың Баштыңы Владислав Ховалыг бо даалганы чогуур ведомстволар болгаш албан черлериниң мурнунга салган.
Чазактың Аппарат хуралынга, ОБЯ-ның регионалдыг эргелелиниң неделя санының илеткелинге агаарның сооп база одалга сезону эгелээни-биле бажың өрттериниң саны көвүдээнин дыңнаткан соонда, ук даалганы берген. Чүгле эрткен неделяда өртчүлер 29 катап өрттерже үнген. Камгалакчыларның дыңнатканы-биле алырга, чыл эгезинден бээр Тывада 936 бажың өрттери болган, 2023 чылдың январь–октябрьга деңнээрге, 52 эвээш. Айыыл-халаптан 11 кижи өлген, 39 кижи когараан.
Тываның Баштыңы 2021 чылдан эгелеп ыш медээчизин халас салыр ажылдар эгелээнин, чылдан чылче өлүп-хораанының сан-чурагайы эвээжеп, ол эки түңнелдерлиг болганын сагындырган. Бо хүнге чедир 1 муң ажыг өг-бүле, оларның хөй кезии хөй ажы-төлдүг өг-бүлелер, автономнуг өрт медээчилери-биле дериттинген.
Ынчалза-даа кандыг-даа дериг-херексел үрелип, азы ажылдаар байдалын чидирип болур. Ынчангаш одалга сезонунуң бүдүүзүнде программаның чаа киржикчилериниң бажыңнарынга медээчилерни эптеп салыры-биле чергелештир шагдагы херекселдерниң байдалын хынаар. Ажыглаар хуусаазы эрткеш үрелген медээчилерни солуур, чаа батарейлерни салыр.
Тываның Күш-ажыл болгаш социал камгалал яамызының, өг-бүлеге болгаш уругларга социал дуза төптериниң, контроль-хайгаарал органнарының ажылдакчыларындан тургустунган ажылчын бөлүктер хыналданы чорудар. Суугулар болгаш чылыдар херекселдерни хөй ажыглаар одалга сезону эгелээни-биле, мындыг рейдилерни кварталда чаңгыс катап-даа болза, чорудар болза эки деп, Владислав Ховалыг чугаалаан.
ОБЯ-ның регионалдыг эргелелиниң дыңнатканы-биле алырга, 2023 чылда Тывага 1108 бажың өрттери болган, оларның үштүң бир кезии чурттакчыларның оран-саваларынга. Печка одаарының өртке удур айыыл чок чорук дүрүмнерин хажытканы, электри удазыннарында үрелиишкиннер, от-биле оваарымча чок чорук – өрттерниң кол чылдагааннары ында.
А. МОНГУШ.
“Шын” №86 2024 чылдың ноябрь 9