“Республиканың чурттакчы чонунга ажыктыын бодавышаан, тарифтер политиказының дугайында айтырыгларны бодумнуң хыналдамга алыр мен. ТДРК-биле хөмүр-даш өртээн өйлээр ажылды уламчылап, чонга хөмүр-даш садып алырынга эптиг байдалды тургузар сорулгалыг одалга складтарын ам-даа ажыдар бис. “Социал хөмүр-даш” төлевилели база боттанып турар. Эрткен чылын бо төлевилелче, мобилизацияже кыйгырткан хамаатыларның өг-бүлелери-биле кады, барык 5 муң өг-бүле кирген” – деп, Тываның Баштыңы чугаалаан.
2021 чылдың июль айдан эгелеп Россияның Чазааның шиитпири-биле Тываның албан черлеринге электри энергиязынга чиигелделиг тарифти тургускан. Бо чылдың төнчүзүнге чедир ол күштүг болур. Дараазында чылын ук тарифти узадыр дугайында айтырыгны ажылдап кылып турар.