Тываның сайыттар кабинеди өртке удур онза байдалды август 23-ке чедир узадыр шиитпирни хүлээп алган. Кат чыыр сезон эгелээни-биле кижилерниң арга-арыг кирери көвүдээринден онза байдалды узаткан. Бо үеде арга-арыгга өрт айыыл-халавы күштели бээрин мурнундагы чылдар көргүскен. Тываның Баштыңы Владислав Ховалыг арга-арыг камгалалынче күштү мөөңнээри эргежок чугула дээрзин айыткаш, чаңгыс чер чурттугларын өрттү болдурбазының чурумун сагыырынче база арга-арыгга хумагалыг болурунче кыйгырган.
Өртке удур онза хемчеглерни чорударга, хамаатыларның арга-арыг кирери, ол ышкаш одаг кыпсыры, кургаг оът-сиген, бок өрттедири эвээжээр дээрзин Тыва Республиканың арга-арыг ажыл-агый болгаш бойдус ажыглалының яамызы дыңнадып турар.
Арга-арыг ажыл-агыйындан тускай чөпшээрел бижикти алгаш, арга-арыг камгалалының инспекторларынга бүрүткелди эрткеш, ынчан чүгле тайга-таскыл үнүп болур. Чөпшээрелди кожууннарның арга-арыг ажыл-агыйлары берип турар. Олар арга кирер кижилерни болгаш транспорту демдеглеп алыр ужурлуг. Чүгле өртке удур ажылдар күүседип турар кижилер болгаш автотранспорт аңаа хамаарышпас.
Регионалдыг диспетчер албанының медээзи-биле, Каа-Хем болгаш Тес-Хем кожууннарда арга-арыглар өрттенип турар. 2023 чылдың август 3-те республиканың арга-арыгларында 6,3 га шөлде 2 өрт хып турар, 26,3 га шөлде өрттү өжүрген. 2023 чылда өрт айыылының сезонунуң эгезинден тура республикага ниитизи-биле 3530 га шөлге 86 өрт.хып үнген.
Бистиң корр.
"Шын" №58, 2023 чылдың август 5