Буддийжи шуулганга белеткел ажылдарының база бир кол киржикчилери — «Сүбедей» дизайн-студия.
Шуулганга белеткел ажылдары эрткен 2025 чылдың декабрь айдан тура эгелээн. Кымнар кандыг ажылдар кылырын, кайы албан чери чүнү кылырын хүлээнип алган.
«Сүбедей» дизайн-студия дыка үр үе дургузунда аңгы-аңгы төлевилелдерге киржип, тыва национал угланыышкынныг суй белектер бүдүрүп, Чазактың даалгазы-биле улуг хемчеглерниң ажылдарынга киржип турар. «Сүбедей» дизайн-студияны тургузуп алган аныяк өг-бүле Аира Ынаалай биле Сайдаш Самдан бо удаада база даалганы алганнар.
«2026 чылдың майда Кызылдың аэропортунуң ишти-даштын чаартып эгелээн бис. Ооң мурнунда чылдарда аэропорттуң иштинде ханазының чүгле өңүн өскертип турган болза, бо чылын немей каасталгалар база кылдывыс. Ол дээрге-ле тыва угулзалар болгаш бурун скиф шинчилиг аян киирген чуруктар, дүрзүлер-дир. Даштын өңгүр болгаш аэропорттуң хевиринге дүүштүр көгертир будааш, ийи талазындан чырып турар кылдыр кылдывыс. «Кызыл» деп сөстүң үжүктери ийи талазындан чырып турар апарган» – деп, Аира Ынаалай тайылбырлады.
Буддийжи шуулган бүдүүзүнде «Сүбедейниң» ажылдакчылары Сүбедей спорт комплекизиниң иштинде хараачаны кылып турда, ажыл-ижин сонуургап четкен бис. Спорт комплекизиниң дээвииринде кылган өгнүң хараачазындан ак-көк дээрде эзирлер ужуп турар ышкаш кылдыр чогаадып кылган болду.
Олар «Азимут» аалчылар бажыңының чанында коттедж бажыңның даштын база төлевилел ёзугаар будааннар. Оон аңгыда Алдын-Булактың «Небесная врата» (дээрниң хаалгазы) деп төлевилелин хүлээнгеш, база кылып доосканнар.
Келген аалчыларга бээр суй белектерниң чамдыызын база чагыг ёзугаар кылганнар. Ырак-чооктан келген лама башкыларга тускай хаптыг болгаш шуулганның логотивин чураан ыяш аяктарны база олар чогааткан. Чонар-даштан янзы-бүрү дүрзүлер кылып турар ус-шеверлерниң ажылдарын сугар саваларның автору база «Сүбедей» дизайн-студиязы болуп турар.
Дизайн-студияның амгы үеде командазында ниитизи-биле 20 кижи ажылдап турар. Олар шупту аңгы-аңгы ажылдарны холу-биле тудуп кылып турар уран-шеверлер. Чамдык хүннерде хөй кижи херек апаарга, шупту кады чыглыпкаш, дем-биле кылыптарлар.
Кижи бүрүзү өскээр чардыкпайн, эртенден кежээге чедир ажылдаарынга эптиг кылдыр, 20 кижиге изиг чемни организастаан. Албан-биле ажылчыннарны аъшкарып-чемгерери-биле Аираның ава-ачазы Рада Сүрүновна биле Аир Кинаевич Эрзинден кидис өөн чүдүрүп алгаш келгеш, уруунуң хериминиң иштинге тиккеш, аъжын-чемин кылып берип турганнар.
«Өөм ээзи Сайдаш Николаевичиниң төрел акы-дуңмалары шупту бо ажылда киржип турар. Дуңмалары Күдерек биле Түмен бистиң-биле доктаамал ажылдап турарлар. Акылары Арслан Николаевич биле Тэмир Кимович база үргүлчү бисти деткип турарлар. База бир ажылдакчывыс Шолбан Белекпен шупту станоктарга дыка нарын ажылдарны кылып билир. Чамдык оолдарны, ажыл көвүдей бээрге, кыйгырып алыр бис. Душкан кижини бо ажылче алыры болдунмас. Ус-шеверлер кылып шыдаар ажылдар-дыр ийин. Акша-төгерик сүржүрү, керээлер чарары, херек материалдар садары, чагыдары, акша-шалың төлээри дээн ышкаш организастаар ажылдар меңээ хамааржыр» – деп, Аира чугаалады.
Аныяк сайгарлыкчы өг-бүле бо шуулган соонда хүн бүрүде кылып турган ажылдарын уламчылавышаан, мөңгүн болгаш алдын-биле чайырлаан каасталгалар кылыр мастерская ажыдып алыр сорулгалыг.
«Тыва культуравыс дыка байлак ышкажыл. Ону көргүспүшаан, эр, кыс улуска чараш каасталгалар кылыр сорулгалыг бис» – деп, Аира Айыр-Санааевна бодалдары-биле үлешти.
А. ОНДАР чугаалашкан.
Буян ООРЖАКТЫҢ тырттырган чуруу.
«Шын» №32 2026 чылдың август 20
"Шын" солуннуң МАХ-каналынга каттыжыңар: max.ru/channel_shyn