2021 чылда-ла эгелээн Өвүр кожууннуң оруунуң 1046-гы километринден 1066-гы километринге чедир участогунуң үндезин септелгезин орукчулар бүрүнү-биле дооскан.
Шак ынчалдыр «Енисей» автооруктуң 20 километр кезиндээниң сөөлгү чадазында ажылдар доозулган. 2021 чылда шалыпкын ажылдарның түңнелинде 10 километр орукту ажыглалга киирген турган (планда көрдүнгенин ёзугаар 5 км орнунга), эрткен чылын база 5 километрни.
Үндезин септелгениң үезинде специалистер орук шывыын солаан, суг эрттирер хоорзаларны тургускан, түңнелинде, орук шывыынга мөөңнелген суг аңгы коошпалап, арыглал дериглеринче агып чоруй баар апарган.
Орук шимчээшкининиң айыыл чок чоруун хандырары-биле, аңаа чаагайжыдылганың бүрүн ажылдарын чоруткан.
«Тыва Республиканың девискээринде демир-орук шугуму чок, ынчангаш Р-257 «Енисей» автоорук Красноярск – Абакан – Кызыл – Хандагайты – Улангом – Ховд – Урумчи аразының кызыгаар кежилдир садыг-саарылга чүъктерин аргыштырар кол транспорт судалы болуп турар. Кылдынган ажылдарның ачызында орук шимчээшкининиң бүгү киржикчилеринге дыштыг, а кол чүүл – айыыл чок байдал тургустунган” — деп, «Енисей» автоорук федералдыг казна чериниң Тыва Республикада эргелелиниң директору Владимир Мельников демдеглеп турар.
Бо чылын Тываның девискээринде Солчур болгаш Хандагайты суурларда 6 км федералдыг орукту септээн дээрзин демдеглеп каалы. Бо чылдың төнчүзүнге чедир ам-даа ийи объектиге: Өөк болгаш Хөндергей хемнерни кежилдир көвүрүглерге узун дурту 150 погон метр ажыг ажылдарны доозар.
/ Бистиң корр.
“Шын” №94 2023 чылдың декабрь 9