Тывада делегей чергелиг хореограф Константин Семёнов чедип келген. Ол “Ак салгын” деп Балет театрының артистеринге “Эргинни артап ора...” деп сөс чок азы чүгле пластикадан тургустунган шиини салып турар.
Шииниң репетициялары октябрь айдан тура эгелээн-даа болза, чогум чүү дугайында шии дээрзи, тывызык болуп артпышаан. Кижиниң мага-бодунуң шимчээшкининден ооң чүнү чугаалаксап турарын билип алыры ындыг-ла белен эвес. Ол дугайында шииниң тургузукчузу хореограф мынчаар тайылбырлап турар:
Баш бурунгаар чүгле шимчээшкинден тургустунган шииниң утказын чугаалаан ажыы чок. Шимчээшкинде кандыг утка сиңгенин кижи бүрүзү бодунуу-биле билип алыр ужурлуг. Эрте-ле чугаалап кааптар чүве болза, ону тургускан херээ чүү боор, аялганы бижиирде, кижи бүрүзүнге утказын тайылбырлавас-ла болгай. Бир эвес аңгы-аңгы көрүкчүлерниң бодалы дүгжү бээр болза, дыка-ла эки болур ийик – деп, Константин Семенов чугаалаан.
Ынчап кээрде, көрүкчүге шииниң утказын чүгле бодунуу-биле хүлээп алыр эргени берип турар.
Шиини Тываның В. Көк-оол аттыг Национал хөгжүм-шии театрынга көргүзер.
ТР-ниң Культура яамызының медээзи.
“Шын” № 86 2023 чылдың ноябрь 11