Тываның Баштыңы Владислав Ховалыгның даалгазы-биле ТР-ниң Орук-транспорт комплекизиниң яамызы Кызылдың аэропорту-биле кады сөөлгү ийи чыл дургузунда хемчеглерни чорудуп келген. Ол дээрге S7 авиакомпанияның Airbus A320 самолёттарын хүлээп алыр эргени алыр ажылдар-дыр. Airbus A320 деп ишкир болгаш улуг пассажир самолёттары-дыр.
Июнь 17-де Новосибирск — Кызыл рейстиң самолёду Кызылга ужуп келген. Бо хүнде аэропорт техника талазы-биле шак-ла мындыг борттар хүлээп алырынга белен. Ол механиктер, инженерлер болгаш херек дериг-херексел-биле четчеленген.
Кызылдың аэропортунга бир дугаар Airbus A320 класстың агаар судноларын хүлээп ап турар дээрзин ТР-ниң орук-транспорт комплекизиниң сайыдының оралакчызы Денис Хангай чугаалаан. Ооң мурнунда 100 олуттуг Кызыл — Москва — Кызыл рейстиг Sukhoi Superjet 100-тү хүлээп турган. Эрткен чылдан тура республика-биле S7 авиакомпанияның Кызыл — Новосибирск— Кызыл рейстиг 75 пассажир олурар Embraer 170 агаар борттары ажылдап эгелээн.
Кызылдың аэропорту бир дугаар 170 пассажир кире бээр Airbus A320 класстың агаар бортун хүлээп алганы ол.
«Мындыг самолёттарга фюзеляжының (самолёттуң уну, өзээ) узуну-биле тускай негелделер негеттинер, чижээ өртке удур айыыл чок чоруктуң деңнели дээн ышкаш. Орук-транспорт яамызы бешки категорияның херечилелин алган. Ужудуушкунунуң санын барымдаалап тургаш алдыгы категорияны дуглаар. Ол категорияның барымдаазы-биле бөгүн Airbus A320 борттарны хүлээп эгелээни ол-дур» — деп, орук-транспорт комплекизиниң сайыдының оралакчызы чугаалаан.
Республиканың чурттакчылары агаар сөөртүлгезинге хереглели улуг. Июнь айдан тура S7 авиакомпания Новосибирскиже хүннүң-не рейстерни чорудуп эгелээн — неделяда чеди катап. Четверг хүннеринде Новосибирскиже хүнде ийи катап ужуп турар.
Рейстиң ортумак өртээ хереглелиниң болгаш долдунганының аайы-биле 8 муң хире рубль болур. Красноярск болгаш Улан-Удэ хоорайларже субсидиялыг рейстер бар. Республиканың Баштыңының даалгазы-биле Красноярскыже немелде «дыштаныр хүн рейстерин» база ажыткан. Эрткен чылын ол рейстер хереглели болгаш долдуртунары-биле эки көргүзүглүг болган.
Бо хүнде S7 авиакомпания Новосибирскиже хүннүң-не рейстерни чорудуп турар. Удавас четвергтерде дүъш соонда ужар ийиги рейстерни ажыдарын планнап турар. Ол рейс Красноярскыже угланган «дыштаныр хүн рейзи» ышкаш болур.
Бо самолётка эптиг байдалга ужуп келгенин пассажир Сергей демдеглээн: «Ооң мурнунда рейстер таарымчалыг-даа болза, доктаамал эвес турган, ам хүннүң-даа болза ужуп болур-дур».
Кызыл хоорай чурттакчызы Светлана Кожина найысылал Кызылда ажылдап турар-даа болза, үргүлчү сургакчылаар. 170 кижини олуртуп алыр чаа самолётка ужуп келгенин, өртектер база дыка аар эвес апарганын ол өөрүп чугаалаан.
«Анаада билеттерни баш бурунгаар садып алыр болгай. Ам эптиг апарган-дыр. S7 авиакомпанияның төлээзиниң тайылбырлааны болза, неделяда сес рейсти, бөдүүнү-биле чугаалаарга, аай-дедир дөрт рейс кылыр-дыр. Магалыг-дыр! Бистиң Орук-транспорт яамызынга өөрүп четтирер-дир мен, улуг самолёттар хүлээп алыр чаа дилиндекти тургусканы дээш» — деп, Светлана өөрүшкүзүн илереткен.
S7 авиакомпанияның Airbus A320 агаар борту делегейде эң-не нептереңгей самолёт дээрзин ооң инструктор-ужудукчузу Антон Левашов демдеглээн.
«Борттуң хонупкан дилиндээ дески, техниктиг системазында шүгүмчүлел чок-тур. Самолёттуң ужудуушкуну 1 шак 15 минута кыска үе дургузунда ужар болгаш, кывар-чаар чүүл кутпас-даа болза анаа, чедер»— деп, ол чугаалаан.
ТМГ-ниң медээзинден.
Буян ООРЖАКТЫҢ тырттырган чуруктары
“Шын” № 45 2024 чылдың июнь 19