Шагаа байырлалын эрттирериниң талазы-биле Тыва Республиканың организастыг комитеди Чаа чылда чаагай чүүлдерни дилеп, оран-делегейге, ие-бойдузунга өөрүп четтиргенин илередип, ак чемни саңга өргүүр езулалды эрттирер черлерни тодараткан. Февраль 21-де хүрээлерге база өске үш черге Шагааның баштайгы эртениниң бирги хүн херелин уткуур езулалдар болур.
Ооң мурнунда чылдарда ышкаш, бо чылын саң салыр езулалды Дөгээ даанга, Тыва Республиканың Культура болгаш дыштанылганың национал парыгынга база «Кадарчы» тураскаалының чанынга организастаар. Оон аңгыда Цеченлинг, Даши Панделинг, Үстүү-Хүрээ, Дамба Брайбуллинг, Гандан Чойпелинг хүрээлери езулалдарже чонну хаара тудар.
Саң салыр чер чөөн чүк талазында, бедик, арыг чер болур. Саңга ажыглаар арыг ыяштарны дең-дең кылдыр чарар. Чер-чер аайы-биле саңны салып алыры аңгы: дөрт-булуңчуктай ийик бе, азы пирамида хевирлиг.
Сүттен кылган ак чемнер дээжизи, чигир-чимистер, саржаг, далган салган саңны лама, хамнар артыш-биле кыпсып, езулалды эрттирер. Езулалдың киржикчилери өргүл өргээн одагны үш катап долганып, чаа үнген чылда бүгүдеге эки чүүлдерни дилеп, йөрээл сөстерни дамчыдып, чүдүп тейлээр.
Чоокка чедир-ле саң салыр езулалды дүне кыпсып турган болза, сөөлгү ийи чылда эртенги хүн хаяазы-биле деңге ону кылыр апарган.
Тываларның ужур-чаңчылы-биле алырга, саң салыр езулалга чүгле эр кижилер киржир ужурлуг.