Хүндүлүг чаңгыс чер-чурттуглар! Тываның хереглекчилер рыногунда тургустунуп келген байдалга хамаарыштыр, ТР-ниң Экономика яамызы хүн бүрүнүң мониторингизин чорудуп, аъш-чем болгаш чиг эт барааннарының өртектериниң өй-чижек чокка өстүрүп алган таварылгаларга хамаарыштыр, чурттакчы чоннуң айтырыгларынга оперативтиг харыы бээр 8-923-014-7002 – «изиг шугум» телефону ажыттынган дугайында дыңнадып тур.
«Изиг шугум» телефонунче үш хонуктуң дургузунда 90 ажыг айтырыглыг медээ кирген. Оларның хөй кезии Кызыл, Ак-Довурак, Чадаана, Шагаан-Арыг хоорайлар база Самагалдай, Тээлиден кирген. Айтырыгларның хөй нуруузу чигир, рис, гречка, макарон кылыгларының өртектеринге хамаарышкан болуп турар. Чижээлээрге, Кызыл хоорайның РПС баазазында бир килограмм чигир өртээ 36 рубльден 52 рубль аразында өскерлип чоруп турар. Кызыл-Мажалыкта бир килограмм чигир өртээ 34 рубль.
Аъш-чемниң өртектериниң өскениниң чылдагааны Хакасияда аъш-чемни мөөңү-биле садып үндүрүп турар хандырыкчыларның талазындан болуп турар. Аңаа хамаарыштыр бистиң талавыстан Хакас Республиканың Экономиктиг хөгжүлде яамызынче болгаш Федералдыг монополияга удур албанының Тыва Республикада девискээр эргелелинче садып үндүрүп турар өртектерниң барымдаа чогун хынаары-биле дилегни чоруткан.
Аъш-чем барааннарынга хереглел, эң хөйү-биле март 18-19 хүннеринде демдеглеттинген.
Садыгларда куруг делгиирлер чок, рыноктар чурум езугаар ажылдап турар. Ол ышкаш складтарда аъш-чем барааннарының курлавырлары үргүлчү немежип турарын айтып каалы.
Барымдаа чок өртектер өстүрген таварылгаларны эскерген болзуңарза, «ТР-ниң Экономика яамызының изиг шугуму» – 8-923-014-7002 дугаарынче долгап, азы вайберде бөлүүнче бижиптериңерге, специалистер харыылап бээр.
Чуруктарда Кызыл хоорайның төвүнде "Кристаллинка" садыы. #Шын