Сагыш човангыр коллегам

«Шын», «Тувинская правда» солуннарныӊ идепкейлиг бижикчизи, Россияныӊ, Тываныӊ журналистер эвилелиниӊ кежигүнү «Чадаана хоорайныӊ хүндүлүг хамаатызы» аттыӊ эдилекчизи, «Күш-ажылдыӊ хоочуну» Ольга Доржуевна Салчак апрель 24-те 75 харлаар.

Ол чалыы үезинде Кызылдыӊ башкы институдун чедиишкинниг дооскаш, Бай-Тайга кожууннуӊ Тээли ортумак школазынга орус дыл, литература башкызы болуп, баштайгы күш-ажылчы базымнарын эгелээн. Салым-чолун кадып, кады чурттаан ынак эжин оон тып, ѳг-бүле тудуп, бир кыстыӊ, ийи оолдуӊ ынак иези болган. Амыдыралдыӊ ѳѳрүшкү-маӊнайын, кадыг-бергезин-даа кѳрүп, шыдап эртип келген тѳлептиглерниӊ бирээзи. Ада-иези, ѳѳнүӊ ээзи чоок кижилерин чидиргеш, ажы-тѳлүн чааскаан эртем-билигге чедирип, бут кырынга тургузары-биле, ѳскен-тѳрээн Чадааназынче ээп келген. «Чаа орук» солунга, хоорайныӊ чагырга черинге ажылдап, Чѳѳн-Хемчик кожууннуӊ сайзыралынга үлүг-хуузун киирип чораан. Хүндүлүг дыштанылгаже үнген соонда, оглу-кызыныӊ аразынче чоокшулап, Кызылда чурттай берген. Республиканыӊ парлалга органнары-биле харылзаазын үспейн улаштыр бижип, «Тыва Мотиватор» сеткүүлге очулдурукчулап ажылдаан. Ольга Доржуевнаныӊ сеткил-сагыжы хѳй-ниитиниӊ социал байдалы, улуг-бичии кижилерге айыылдыг хѳй черлик ыттар, чааскаан арткаш, берге байдалда келген таныыры кижилер дээш дүвүреп, сагыш човаарын бо-ла эскерер мен. Ынчангаш чогуур черлерже адрестеп айтырыг кѳдүрген түӊнелинде, бир кижини нерв эмнелгезинге, ѳскезин приютка чыттырып, хоочун башкыны шаӊналга киирер дээш уттундурган документилерин-даа сүржүп берген. 2–3 чыл бурунгаар Бай-Хаакская 14-те чаа поликлиникаже элээн үе дургузунда аргыштырылганы шиитпирлевейн турганын сактып келиӊер даан. О.Д. Салчак орус, тыва солуннарга «коӊгалап» чырыткан соонда, 15 дугаарлыг маршрутту доктаатты. Кемдээн, даянгыыштыг улуска, ырак-чооктан кылаштажып ажылдап турар техниктиг персоналга ѳй-шаанда ачы-дуза ышкажыл. Кижи бүрүзү машиналыг эвес болгай, хүннүӊ-не 2 катап таксилээр акша ажылчын санитарларга бергези шын.

Кѳзүлбес, билдинмес ачы-буянныг кижиниӊ 75 харлаан оюнда ооӊ бодун номчукчуларга таныштырары артык эвес. Ольга Доржуевнага ѳлчей-кежикти, быжыг кадыкшылдыг болуп, ам-даа узун назылаарын йѳрээп, күзеп каалыңар чонум.

Нина СЕРЕНОТ, хоочун чогаалчы, журналист.

«Шын» №31 2024 чылдың апрель 24