Кемерово хоорайга сентябрь 7–8 хүннеринде бүгү Россия чергелиг бодибилдинг маргылдаазы болуп эрткен. 250 эр, херээжен, элээди оолдар, уруглар аразынга болган маргылдаа кил база дурт-сын аайы-биле, фитнеске, бодифитнеске, атлетика, классиктиг хевирлерге бедик деңнелге болуп эрткен.
Бо маргылдаага бистиң спортчувус Сай-Херел Тюлюш “Классиктиг бодибилдинг” деп хевирге, күштүг белеткели-биле тулган тиилекчи деп атка төлептиг болуп хамыкты кайгаткан.
Бо тиилелге бистиң тыва спортчулар аразында бир дугаар улуг чедиишкин база төөгүлүг болуушкун. Сай-Херел бодунуң чүткүлдүг, соруктуг чоруу-биле үргүлчү Сибирь девискээринде шыырактарның санынче кирип турар. Алыс боду бичиизинден хүрежир, 2015 чылда пауэрлифтингиге 100 килдиг спортчулар аразынга 235 кил аар штанганы көдүргеш, республиканың чемпиону деп атка төлептиг болган.
Сай-Херел Тю- люш – бодибилдингини күзели-биле шилип алгаш, бичии оолдарны, мөгелерни күш-шыдал талазы-биле белеткеп, тренерлеп чоруур үлегерлиг башкы. Ол тыва эр кижиниң хей-аъдын көдүрүп, тыва оолдарның сонуургалын оттуруп чоруур спортчу. Эр кижиниң шак-ла ындыг овур-хевири тыва тоолдарда бижиттинген болгай.
А. ЧАМБАЛ-ООЛ.
Чуруктарны интернеттен алган.
«Шын» №69 2024 чылдың сентябрь 11