Тываның Баштыңы Владислав Ховалыг социал четкилерде бодунуң блогунда, республиканың сайгарлыкчыларынга социал харыысалгазы база ачы-буянныг херектерге доктаамал киржилгези, ажыл-ишчизи база карак кызылы дээш четтиргенин илередип, сайгарлыкчы ажылынга чедиишкиннерни болгаш чечектелиишкиннерни күзээн.
"Бистиң чаңгыс чер чурттугларывыстың негелделиин эки билир силер, ынчангаш шынарлыг амыдырал хүрээлелин тургузуп, хереглелди эскерип, амгы үениң ачы-дузаларын сайзырадып чоруур силер. Коронавирус халдавырының пандемия үезинде база амгы – тускай шериг операциязының үезинде боттарыңарның бир демнииңерни көргүскен силер" – деп, Владислав Ховалыг демдеглээн.
Сайгарлыкчы чорук – “элээн нарын эртем”, ынчангаш ону шиңгээдип алган кижи хүн бүрүде аңгы-аңгы бергелерге болгаш баш муңгаш чүүлдерге таваржы бээр деп, баштың демдеглээн. Ындыг болзажок, республикада сайгарлыкчылар саны доктаамал немежип турар: чүгле эрткен чылда биче болгаш ортумак бизнестиң муң ажыг төлээлери каттышкан.
"Олар боттарының ынак херээн уламчылап, бистиң республиканың экономиктиг сайзыралын хандырып, турум чорукту берип турар. Ол ышкаш боттарының ынак ажыл-ижинге хандыкшаан талантылыг сайгарлыкчылар бисте көвүдээн" – деп, тыва губернатор демдеглээн.
Российжи сайгарлыкчы чорук хүнүнге тураскаадып, Тывада биче болгаш ортумак бизнести деткииринче угланган хөй санныг ажыл-агыйжы хемчеглер бүдүн майның дургузунда эртип турар. Эрткен неделяда Тываның Баштыңы биче болгаш ортумак сайгарлыкчы чорук төлээлери-биле ужуражып, улуг садыг шөлдери-биле чижилгени тургузарының, тус черниң сервизин хөгжүдериниң аргаларын сайгарып чугаалашкан.
Кызылда Аныяктар ордузунга бодун ажыл-биле хандыртынган кижилерниң III республика шуулганы – неделяның кол болуушкуну болган.