Делегей чергелиг IV буддийжи шуулганның албан ёзузу-биле ажыдыышкыны болгаш пленарлыг хуралы «Сүбедей» спортчу комплекске болган соонда, Тываның күрүне университединиң өөредилге-лабораторлуг корпузунга сайгарылга шөлчүгештери ажылын уламчылаан.
Бир дугаар «Буддизм болгаш медерел» сайгарылгалыг шөлчүгешти Тываның күрүне университеди болгаш Камбы-лама эргелели белеткээн. Ооң башкарыкчызы Россияның өөредилге академиязының академиги, Россияның эртемнер академиязының кежигүн-корреспондентизи, М.В. Ломоносов аттыг Москваның күрүне университединиң психология факультединиң деканы, Психология институдунуң директору, психология эртемнериниң доктору, профессор Юрий Петрович Зинченко болган.
Ийи дугаар «Буддизм болгаш экология» сайгарылгалыг шөлчүгешти ТывКУ болгаш Тываның бойдус курлавырларын шиңгээдир институт белеткээн. Ону Томскунуң национал шинчилелдерниң күрүне университединиң Биология институдунуң ботаника кафедразының профессору, биология эртемнериниң доктору Сергей Николаевич Кирпотин башкарып эрттирген.
Үш дугаар «Буддийжи болгаш национал культураның үнелелдери – туризм болгаш аалчылар хүндүлээр чорук сайзыралының шимчедикчизи» сайгарылгалыг шөлчүгешти Культура яамызы, Тываның туризм талазы-биле күрүне комитеди, Тываның гуманитарлыг шинчилелдер институду демнежип белеткээн. Ооң ажылын Тываның Алдан-Маадыр аттыг национал музейиниң директору, филология эртемнериниң доктору, Россияның бойдус эртемнериниң академиязының болгаш Россияның эртем деткиир ассоциациязының академиги, ТывКУ-нуң хүндүлүг профессору Каадыр-оол Алексеевич Бичелдей башкарып эрттирген.
Дөрт дугаар «Буддийжи чаңчылчаан медицина, ооң өске эмнээшкиннер-биле демнежилгези болгаш чидиг айтырыглар» деп сайгарылгалыг шөлчүгешти Кадык камгалал яамызы, Тыва Республиканың эмчи-социал айтырыглар болгаш башкарылга талазы-биле эртем-шинчилел институду, К. Шойгу аттыг культура фондузу белеткээн. Ооң ажылын медицина эртемнериниң доктору, РФ-тиң Күрүне Думазының Кадык камгалал комитединиң даргазының оралакчызы Бадма Николаевич Башанкаев удуртуп эрттирген.
Улуг хемчегге Россияның аңгы-аңгы регионнарындан болгаш даштыкы күрүнелерден төлээлер киришкен.
Бистиң корр.
Ада ТЮЛЮШТУҢ тырттырган чуруктары.
«Шын» №32 2026 чылдың август 20
"Шын" солуннуң МАХ-каналынга каттыжыңар: max.ru/channel_shyn