Якутск хоорайда Триумф аттыг спортчу өргээге февраль 1–2 хүннеринде бир дугаар делегей чергелиг хапсагай маргылдаазы болган. Якутияның чазаа болгаш чону боттарының ынак хүрежи хапсагайга 1 дугаар делегей чергелиг маргылдааны “Кадык амыдырал” төлевилелди болгаш Россияның Президентизи Владимир Путинниң спорттуң национал хевирлерин калбаа-биле сайзырадыры болгаш Олимпиада оюннарынче киирери деп бот-идепкейин боттандырар сорулга-биле бедик деңнелге эрттиргеннер. Бир дугаар делегей чергелиг маргылдаага 10 региондан база 10 даштыкы чурттар: Иран, Азербайджан, Индия, Белоруссия, Казахстан, Кыргызстан, Узбекистан, Моолдан 500 хире мөгелер бедик шаңнал дээш хүрешкеннер.
Хапсагай маргылдаазы аныяктар база хоочуннар аразынга дараазында килдерге олимпийжи дүрүм езугаар солун деңнелге болуп эрткен.
Аныяктар аразынга: 57, 65, 70, 75, 85, 95 килдерге база 95 килден өрү мөгелер хүрешкен. Хоочуннар — 60, 70, 80, 90 база 90 килден өрү килдиг. Бистиң аныяк мөгелеривистен хостуг хүрешке спорт мастери Альберт Тумат 65 килдиглер аразынга хүрешкеш, 2 шаңналдыг черге төлептиг болган. Хоочуннар аразынга 90 килден өрү 16 мөге аразынга Чаан мөге Сайын-Белек Түлүш шүглүп үнген.
Тулган тиилекчини илередири-биле, 75 килден өрү 24 мөге ачыр-дачыр хүрешти көргүскеннер. Оларның аразында 2024 чылдың хапсагайга 75 килге чедир мөгелер аразынга 1 дугаар делегейниң тулган чемпиону бурят мөге Сандан Гармаев база аар килдиг мөгелер — 2024 чылда хапсагайга тулган тиилекчи Балдан Цыжипов база Эрдем Цыренжапов. Ол ышкаш аныяктар аразынга сумо хүрешке делегей чемпиону, дзюдога Европа чемпионадының призеру, узуну 198 см, 150 килдиг грузин мөге Амиран Сискоридзе киришкен. Грузин мөге 1 дугаар салыгда-ла бажы-биле хевис кырынга ок кадалып, 80 килдиг якут мөге Айсен Килибеевке октаткан. Чартык финал хүрешке эрткен чылгы тиилекчи Балдан Цыжиповту якут мөге Даниил Иванов октаан.
Тулган дээн шыырак мөгени илередир хүрешке Сайын-Белек Түлүш Чурапча школазының мөгези Никита Софронов-биле 8 минута чедир хүрешкеш, сөөлгү секундаларда хояр аргазын чедимчелиг кылып октааш, шүглүп үнген.
Сайын-Белек Түлүш 1 дугаар делегей чергелиг хапсагай маргылдаазынга езулуг эрниң эрези болуп, ол хүннүң маадыры болган. “Чүгле “Чоннуң шевер кылыглар” компаниязының удуртукчузу Вячеслав Нестеровтуң холундан алган шаңналы 2 сая рубль ашкан” — деп, алдарлыг спорт тайылбырлакчызы Александр Васильевич-Көрдүгэн чарлаан. Ол ышкаш 500 муң акшаның сертификады база 1 сая ажыг өртектиг бриллиантылыг 2 медальды алган.
Чоннуң ынак мөгези, Чаан мөге Сайын-Белек Түлүш якут чоннуң хүрежи хапсагайга тулган тиилекчи деп атты алганы тыва чонга улуг чоргаарал. Эр хей мөге, ам-даа адың бедик тут.
Алексей ЧАМБАЛ-ООЛ, спорттуң хоочуну.
Чуруктарны интернеттен алган.
«Шын» №4 2025 чылдың февраль 6