Сака Даваа - делегейниң буддистериниң үш дакпыр улуг байырлалы. Будда Шакьямуниниң төрүттүнгени, Чырыткылыг деңнел четкени база Арыг оранче (нирванаже) чаларап чорутканы. Ыдыктыг айның онзагай хүнү айның 15 чаазы июнь 4-түң хүнүнде таваржыр. Будда Шакьямуниниң чер кырынга төрүттүнгени, кайгамчыктыг оттуушкун (чырыткы) деңнелин четкени болгаш мөңге чыргал, аас-кежик оранынче чаларап чорутканын буддистер демдеглээр.
Сака Даваа айы – ай чурагай-биле 4 дугаар айда май 20 ден – июнь 18 ке чедир уламчылаар. Ол үеде буянныг-даа, нүгүлдүг-даа үүле кылырга, түңнели 1 000 000 катап көвүдээр. Сака Даваа айында чамдык буддистер эът чивес чурумну сагыырын оралдажыр. Ол ышкаш арага-дары, кара таакпы, хоралыг чүүлдерден ойталаары онза чугула.
Оон ыңай ыдыктыг айда дириг бойдуска, амылыг амытаннарга хора чедирбейн, буян чыырынга таарымчалыг ай үнүп келген. Чоок улузунга болгаш өскелерге экини күзеп, болдунар шаа-биле дузаны чедирерге, буяны арбыдаар.
10 кара үүледен ойталап, 10 ак үүлени боттандырза, эки үре-түңнелдиг болур. Бурганнарга сүзүк-бүзүрел-биле тейлеп, Будданың өөредиин боттандырып, тариналардан номчуп, багай үүлени арыглап, хөй буянны чыып алырынга чолдуг ай үнүп келген.
/А. ДОНГАК.
Чурукту интернет четкизинден алган.