Бөгүн, январь 8-те, В.Көк-оол аттыг Национал хөгжүм-шии театрынга РФ-тиң алдарлыг артизи, ТР-ниң улустуң артизи, «Тыва чоннуң чоргааралы» аттың эдилекчизи Анна Ширин-оолду сөөлгү оруунче үдээр ёзулал болган.
Анна Оюновнаны сөөлгү оруунче үдээри-биле, ооң чоок кижилери, дөргүл-төрели, коллегалары, эш-өөрү, культура ажылдакчылары чыглып келген. Чыылганнар салым-чаяанныг артистиң дугайында чылыг сактыышкыннарны чугаалап, чоок кижилеринге кажыыдалдың сөстерин илереткен.
Анна Оюновна бүгү чуртталгазын тыва театрынга бараалгаткан. Ол 1968 чылда Ленинградтың күрүнениң театр, хөгжүм болгаш кинематография институдун дооскаш, В.Көк-оол аттыг Национал хөгжүм-шии театрынче ажылдап киргеш, сөөлгү хүннеринге чедир ажылдаан. Ол 55 чыл дургузунда төрээн театрынга бердинип ажылдааш, 100 ажыг рольдарны күүсеткен.
Театрның коллективи Анна Оюновнаның чоок кижилеринге болгаш ооң мөгейикчилеринге кажыыдалын илереткен: «Анна Оюновнаның чогаадыкчы салым-чаяанының чайынналчак сылдызы кезээ мөңгеде өшпес, келир салгалдың артистери ооң чогаадыкчы ажыл-ижин уламчылаар. Ол кезээ мөңгеде бистиң чүректеривиске артар».
Театрның аныяк артистери Анна Оюновнаны мерген угаанныг, буянныг, сагыш човаачал дагдыныкчы деп билирлер. Ол кажан-даа улуургавас, кижилерге кичээнгейлиг, арга-дуржулгазын харам чокка үлежип чораан.
Анна Оюнова Ширин-оол 2024 чылдың январь 5-те 78 харлап чорааш, чырык өртемчейден чарлып чоруткан.
Тываның алдарлыг журнализи, чогаалчы Александр Шоюн хоочун коллегазын сөөлгү оруунче үдеп келген.
«Миннип келиримге-ле суурга Ленинградтың аныяк артистери шии көргүзүп чедип келген. Олар шупту хып дээн аныяк, дыка чараш ойнаар артистер. Ынчан оларның ойнаарын аажок магадап көөр турдум. Кажан салым-хуум театр-биле домнажы бергенде, Москваның Щукин аттыг театр институдун дооскаш, маңаа театрга ажылдап чедип келгенимде, ол ынчан көдээге көрген аристерим шупту бо тыва сценада болду. Ол артистерни бичии үемде карактарым-биле, ам ойнап турар овур-хевирлерин көргеш, оон-даа магадап көөр турган мен. Ынчан театрның көрүкчүзү турган болзумза, ам ооң ажылдакчызы, артистерниң коллегазы апарган мен. Ол артистер сагыш-сеткилимде ынчаар арткан.
Сөөлүнде бо артистер шупту Тыва Республиканың алдарлыг артизи, Тываның улустуң артизи, РФ-тиң алдарлыг артизи деп хүндүлүг аттарга төлептиг болуп, тыва театрның төөгүзүнде алдын үжүктер-биле киир бижиттинген. Оларның аразында Анна Оюновна. Ол бодунуң студент чорааш ойнап чораан овур-хевирлеринден эгелээш, бо сөөлгү чылдарга чедир ойнап келген рольдары шуптузу тыва теарның алдын шыгжамыры бооп арткан.
Ынчангаш тыва театр улуг чидиригге таварышкан — театрның көскү, хоочун ажылдакчыларының бирээзи дуу оранче «аъттанган», көрүкчүлеринден чарлып чоруткан. Ынчалза-даа оларның кылып каан ажыл-ижи, ойнап чораан овур-хевирлери чоннуң сагыш-сеткилинге кезээ мөңгеде артып калыр. Оларның чедир кылбаан ажыл-ижин аныяк салгалдың артистери ойнап күүседир. Көрүкчүлерниң сагыш-сеткилинге мөңгеде артар силер, Анна Оюновна».
Бистиң корр.
Авторнуң тырттырган чуруктары.