Август 28-те Кызыл хоорайда Туристер бажыңынга чиигелделиг ипотекага хамаарышкан хемчег болган. Хемчегниң эрттирикчилери «Самолет плюс» деп оран-сава садып-саарарынга дузалажыр федералдыг агентилелдиң Тывада салбыры. «Самолет плюс» федералдыг агентилелдиң Тывада салбырының удуртукчузу Аян Серен-Доржу болгаш чаа бажыңнар тудуп турар компанияларның база банкыларның төлээлери хемчегге келгеш, чоннуң сонуургаан айтырыгларынга шын үндезинниг харыыларны берген.
«Самолет плюс» агентилелдиң консультантызы Синчит Ооржактың медеглээни-биле алырга, чаа тудуп турар бажыңнардан ипотека-биле квартира алырда, баш удур чагыг киирер. Чиигелделиг ипотека программазы-биле бажың садып алырда, бир болза «Самолет плюс» агентилел-биле азы тудугжу компанияның боду-биле харылзашкаш, консультацияны ап болур.
Тывада «Трансстрой» болгаш «Регионстрой» деп ийи тудуг компаниялары бар. «Трансстрой» компания найысылалда «Мөңгүн» микрорайонну, а «Взлетная» микрорайонну «Регионстрой» компаниязы бо хүннерде тудуп турар. Тудуг компанияларының кайызының-даа чиигелделиг ипотека, садыг-саарылга дугайында тайылбыр ажылы чорудар консультантылары бар. Баш удур чагыг киирген квартираны ийи неделя дургузунда сатпас. Ол үениң дургузунда банкыга барып садыг-саарылга керээзин чарган турар ужурлуг. Ипотека эрте берген соонда, дараазында айдан эгелеп ай санында график езугаар ипотеканы төлеп эгелээр.
Амдыызында Тывада үш банк чиигелделиг ипотека программазы-биле ажылдаар чөпшээрелди берген. Ол дээрге Россельхозбанк, Сбербанк, Росбанк-тыр.
Бажың тудар ипотека программазы чүгле чер бажыңнарга хамааржыр. Ол 2 хуулуг чиигелделиг ипотекага кандыг-даа хамаарылга чок, аңгы программа болуп турар. Чаа туттунган бажыңнардан квартираларны чиигелделиг ипотека-биле алыр программа 2023 чылдың сентябрь төнчүзүнден ажылдап эгелээр.
Чиигелделиг ипотека алырын планнап турар хамаатыларның кичээнгейинге «Самолет плюс» деп федералдыг агентилел ажыттынган. «Самолет плюсту» таварыштыр ипотека-биле бажың садып ап тургаш, агентилелге акша төлевес.
Чиигелделиг ипотекага хамаарышкан айтырыгларны Кызыл хоорайның Кочетов кудумчузунуң 34 А (офис 405) адресте «Самолет плюс» агентилелинге баргаш, билип ап болур. Агентилелдиң офизи хүннүң-не 10.00 шактан кежээкиниң 20.00 шакка чедир хүлээп алыр.
Айдың ОНДАР
"Шын" №64, 2023 чылдың август 30