ТР-ниң культура сайыды Виктор Чигжит: «Дорт дамчыдылганы коллегаларым болгаш Тываның Чазааның кежигүннери-биле кады көрдүвүс. Россияның 89 регионундан болгаш даштыкыдан келген журналистерниң киржилгези-биле ук хемчег болуп эртти. Президентиниң дорт чугаазы чүгле Россия-биле эвес, а Бүгү делегейниң чоннары-биле болган деп санап тур мен.
РФ-тиң Президентизи культурага хамаарышкан чаңгыс эвес айтырыгга харыылады. Кино залдарының дугайында база чугаалады. Президентивистиң деткимчези-биле Тывада 7 кино көөр зал туттунган. 2019 чылдан тура Кызыл, Ак-Довурак, Чадаана хоорайларга база Барыын-Хемчик, Чеди-Хөл, Улуг-Хем болгаш Кызыл кожууннарга кино көөр залдар ажыттынган.
Республикага кино адырын сайзырадыр сорулга-биле каш хонук бурунгаар режиссёрлар болгаш кинематография-биле сырый харылзаалыг ажылдап чоруур аныяктар-биле ужурашкаш, Тываның кинематографтарының чогаадыкчы эвилелин тургузар деп шиитпирни үндүрдүвүс. Сорулгавыс – тыва кинону сайзырадыры база грантылыг мөөрейлерге киржир ажылдарны кылып чорудары».
“Шын” №98 2024 чылдың декабрь 21