Тываның төвү Кызылга август 15-тен 17-ге чедир делегей чергелиг V сарыг шажын кинофестивалы болуп эрткен.
Фестиваль найысылалга аңгы-аңгы чурттардан келген кинематографистерни каттыштырып, сарыг шажын культуразының философчу болгаш сагыш-сеткил темаларынче угланган онзагай фильмнерни көрүкчүлерге бараалгаткан.
Кинофестиваль ажыдыышкынының хүндүлүг аалчызы – Россияның Кинематографистер эвилелиниң кежигүнү, «Амкарт» кинокомпанияның чиңгине директору Дмитрий Пиркулов. Ол – делегей болгаш бүгү-российжи кинофестивальдарның шилилге комиссиязының даргазы.
Мөөрей программазынче Индия, Кыдат, Япония, Бангладеш, Кыргызстандан, ол ышкаш Алтай, Бурятия, Калмыкия база Якутиядан авторларның ажылдары кирген. Фестиваль киржикчилери 23 кинону көрген.
Делегей чергелиг V сарыг шажын кинофестивалының ажыдыышкынының үезинде аалчыларының болгаш киржикчилериниң онза кичээнгейин «Урянхайлар» деп долу метражтыг уран-чечен фильмниң мөөрейден дашкаар көргүзүү хаара туткан. «Ада», «Эне» база «Кыыс» деп үш новелладан киноальманах кылдыр чогааткан фильм Тываның, Хакасияның, Алтайның болгаш Якутияның чоннарының амгы төөгүлерин көргүзүп турар.
Фестивальдың сөөлгү хүнү август 17-де Аныяктар өргээзинге делегей чергелиг V сарыг шажын кинофестивалын байырлыг байдалга хаап, тиилекчилерни шаңнаан.
Түңнелинде Дээди шаңналга Кыдаттан режиссёр Лам Кан Чжаонуң “Там, где солнце светит ярко” деп ажылы төлептиг болган. Япониядан режиссёр Кен Изумисаваның “Пробуждение” деп кинозу “Эң-не тергиин кыска хемчээлдиг фильм” деп номинацияны алган. Российжи режиссёр Ксения Лагутинаның “Бинго” деп кинозун “Эң-не эки режиссура” деп үнелээн. Кыргызстандан режиссёр Дастан Мадалбеков биле сценарист Рустам Сайдаматовтуң “Потанцуйте с мамой” деп кинозу “Тергиин сценарий” дээш шаңнаткан. Саха Республикадан режиссёр Василий Слепцовтуң база оператор Серафим Фёдоровтуң “Подари мне цветы” деп кинозу “Операторнуң эң-не эки ажылы” деп номинацияга тиилээн. Калмыкиядан режиссёр Арлтан Бембеевтиң “Скамейка” деп кинозунда актёр Нямн Санкуевти “Тергиин эр роль” дээш шаңнаан. Российжи Анастасия Салтыкованың “Ту Ва” деп кинозунга “Тергиин херээжен роль” деп номинацияны берген. Бурятиядан режиссёр Баярма Жалцанованың “Нима-Цырен” деп кинозу “Тергиин актёрлар ансамбли” деп шаңналды алганнар. “Көрүкчүлерниң үнелелинге” Саха Республикадан Михаил Лукачевскийниң “Там, где танцуют стерхи” деп кинозу төлептиг болган. “Жюриниң тускай шаңналын” – Индиядан режиссёр Тарун Джейнниң “Баллада гор”, “Жюриниң тускай демдеглелин” Индиядан режиссёр Пиюш Тхакурнуң “Первый фильми” алганнар. Башкортостандан режиссёр Динара Абдрашитованың “Он сказал – поехали” деп кинозу “Эң-не эки документалдыг фильм” болган. Москвадан режиссёр Владимир Сидоренконуң “Ступпы Будды” деп кинозу “Буддизм дугайында тергиин кино” болуп шылгараан. “Ойнаваан кинонуң тергиин режиссуразы” дээш Забайкальеден режиссёр Антон Золотухинниң “Цугольский дацан. Шаг в Будущее” деп кинозу тергиидээн. “Ойнаваан кинолардан жюриниң тускай шаңналын” “Будда. Жизнь вне времени. Буддийские центры” деп кинога тывыскан. “Ойнаваан кинолардан жюриниң тускай демдеглелин” бистиң режиссёр чаңгыс чер чурттуувус Орлана Серен-Чимиттиң “Узоры жизни” деп кинозу алган.
Төлевилелдиң тургузукчу режиссёру Виталий Петров, продюсери Ролан Ооржак. ТР-ниң Культура яамызы база Хакас Республиканың Алтай район чагыргазының саң-хөө деткимчези-биле кинонуң ажылы чоруп турган.
Чыжыргана СААЯ.
Начын Монгуштуң тырттырган чуруктары.
«Шын» №32 2026 чылдың август 20
"Шын" солуннуң МАХ-каналынга каттыжыңар: max.ru/channel_shyn