Россияның Федералдыг хуралының кежигүнү, сенатор Дина Оюн 2022 чылда ажыл-чорудулгазының дугайында отчедун апрель 13-те ТР-ниң ДХ-ниң депутаттарының мурнунга берген.
Сенаторнуң отчедун дыңнаан хуралга Дээди Хуралдың депутаттары, федералдыг органнарның Тывада албан черлериниң удуртукчулары, хөй-ниити организацияларының төлээлери, эртемденнер болгаш Тываның аныяктар парламентизиниң кежигүннери олурушкан.
«2022 чылда ажыл-чорудулгамны тускайлаттынган шериг операциязының киржикчилерин болгаш оларның өг-бүлезин деткииринче, экономиканың хоойлужудулга талазы-биле хандырылгазынче, биче болгаш ортумак бизнеске дузалаарынче угландырган мен» – деп, сенатор Д. Оюн демдеглээн. Ол ышкаш республикада социал-экономиктиг байдалды база ханы өөренип көрүп, Тываның Чазаа-биле демнежип, федералдыг деңнелге регионнуң эрге-ажыын камгалаарынче улуг кичээнгейни салган.
Сенаторнуң 2022 чылда ажыл-чорудулгазының дугайында отчедун 79 арынныг бичии номчугашка парлаан, ону чыылганнарга үлээн. Оон сенаторнуң кылып чоруткан ажылын тодаргайы-биле билип ап болур.
Донбасска болгаш тускайлаттынган шериг операциязының киржикчилеринге, оларның өг-бүлелеринге сенатор Дина Оюн амы-хууда 1 сая 59 муң 337 рубль деткимчени көргүскен.
Дина Оюн Тывада соңгукчулары-биле сырый харылзаалыг ажылдап турарын массалыг информация чепсектеринде медээлер болгаш социал четкилерде дыңнадыышкыннар херечилеп турар.
Сенаторнуң отчедун дыңнааннар аңаа элээн хөй айтырыгларны салган. Оларның чамдыызынга харыыларны хуралга киришкен Тываның Чазааның Даргазының оралакчызы А. Чюдюк биле экономиктиг сайзырал болгаш үлетпүр сайыды А. Сат олар харыыларны бергеннер.
/ Мерген КЫРГЫС.
Б. ООРЖАКТЫҢ тырттырган чуруу.
"Шын" №27 2023 чылдың апрель 15
Сенатор Дина Оюн 2022 чылдың отчедун берген
16 апреля 2023
95