“Өөредилге” национал төлевилелдиң чорудуу-биле Бии-Хем кожууннуң Сесерлиг школазында үндезин септелге уламчылап турарын чагырга чери дыңнаткан.
Тудуг ажылдары май айда эгелээн. Өөредилге чериниң оран-савазын 60 ажыг чыл бурунгаар туткан болгаш амгы үениң негелдеринге дүүшпес. Үндезин септелге ажылдары доостурга, школаның девискээрин чаагайжыдары база көрдүнген.
– Сесерлиг школазында 187 оолдар, уруглар өөренип турар. “Өөредилге” национал төлевилелдиң ачызында, чаа өөредилге чылында, олар бүрүнү-биле чаартынган школага өөренирлер – деп, школаның директору Урана Маады чугаалап турар.
Оон аңгыда, школаның материал-техниктиг баазазын чаартыры көрдүнүп турар болганда, өөреникчилерге база башкыларга таарымчалыг байдалдар тургустунар.
Бии-Хем кожуунда Сесерлиг болгаш Туран хоорайның 2 дугаар школаларында үндезин септелге чоруттунуп турар. Кожууннуң чагырга чериниң удуртулгазы тудуг сезонунуң кыска хуусаалыын барымдаалап, хүлээникчи тудуг организациялары ажылын шынарлыг болгаш үезинде күүседиринче кичээнгейни угландырарын айыткан.
"ТМГ" Медээлер.