Үш алышкы

ӨӨРЕДИГЛИГ ЧУГААЛАР
Бир-ле катап бурун Кыдатка үш эмчи алышкы чурттап чораан. Кижилер ол үш алышкының хеймерин кожа хоорайлардан тура сурагжаан, эң-не чедиишкинниг ажылдап турар эмчи деп санап турар. Ортун акызынга кээр аарыг кижилер арай эвээш-даа болза, төрээн хоорайында ол билдингир эмчи. А улуг акызын эмчи деп кым-даа эки билбес, чүге дизе аарыг кижилер ол эмчиге шуут келбес деп болур.

Бир-ле катап бир аныяк кижи алышкыларның хеймеринден айтырган: «Сээң эмнедикчилериң чүге хөйүл? Эң-не шыырак эмчи бооруңга бе?»
"Мен кижилерниң аарыын эмнеп, кадыкшылын эгидип турар мен. Ынчангаш кижилер меңээ хөй кээп турар».

Сонуургак оол ортун акызындан база айтырган. «Мен кижилерниң аарыы өөскүвээнде, эге чадазында эмнеп турар мен. Ынчангаш мээң эмнедикчилерим, хеймер дуңмамга бодаарга, эвээш» — деп, ол харыылаан.

Аныяк кижи улам сонуургааш, улуг акызынга чеде бергеш: «Сен чүге кымга-даа билдинмес, эмнеп турар улузуң эвээжил?» — деп айтырган.
Улуг акызы хүлүмзүргеш, харыылаан: «Мен кижилерни бодунуң кадыын камнап, угаан-медерели болгаш мага-бодун деңзигүүрлеп, аарыг эгелевээнде-ле ону чок кылыр кылдыр өөредип турар мен. Ынчангаш мээң сүмелеримни сагып турар кижилер белен аарывас, оларга эмнээшкин херек чок».

“Шын” №44 2024 чылдың июнь 15