Тываның чогаалчылар эвилелиниң Москвада салбырының даргазы Борис Балчий-оолдуң удуртулгазы-биле үш чылдың ажыл-чорудулгазын түңнээн хурал апрель 6-да Москвага болуп эрткен.
Тывазындан ырак-даа чорза, аңаа тыва чогаалдың сайзыралынга үлүүн киирип чоруур Анна Ламажаа, Бижек Комбу, Артык Ховалыг, Зоя Доңгак оларны Борис Константинович москважыларга таныштырган. Оларның хөй ужуражылгаларны эрттирип, чогаалга сундулуг аныяк-өскенни эвилелче хаара тудуп, көскү ажылдарны чорутканын хуралга демдеглээн. Ылаңгыя ВДНХ-га хөй нация чонга тываларның ёзу-чаңчылдарын таныштырып делгээн булуңунга тыва чогаалды хөй катап таныштырып турганы солун болгаш өөредиглиг. Аңаа тыва оюннарны, ылаңгыя кажык, шыдыраа ойнаарын көргүскен. Ол ышкаш чаңгыс экземплярда арткан ''Надя Рушеваның авазы'', ''Хамның чаяаны'' номнарның авторундан катап үндүргеш, калбаа-биле ол номнарын тарадырын чон дилеп турган.
Үш чыл иштинде бо бүгүнү организастап, тарамык тыва чогаалчыларны каттыштырган даргазының ажылын чогаалчылар эки деп үнелээннер. Идепкейжи туруштуг, арга-дуржулгалыг чогаалчылар бот-боттарын деткижеринге, чаа-чаа номнарын үндүреринге Тываның чогаалчылар эвилелиниң Москвада салбырының даргазы улуг рольду ойнаан. Ол бүгүнү массалыг информация чепсектеринге чырыдып, хөйнүң сонуургалын оттуруп, социал четкилерде көрүлделер хөй болурун Тываның төлээ черинге ажылдап тургаш, чогаалчыларны деткип турган Урана Иванованы демдеглээри чугула. Хуралга Москва чогаалчылары аразында чылдың эки номун боттары түңнээш, Россия чергелиг мөөрейлерже киирип, деткикчи дилеп, ном үндүрерин, очулга ажылын уламчылаарын дугурушкан.
Бо бүгү ажылдарны оон-даа эки уламчылаары-биле Москвада Тываның Чогаалчылар эвилелиниң салбырының даргазынга база катап Борис Балчий-оолду москважылар соңгуп алганнар.
Зоя ДОНГАК, эмчи, шүлүкчү, прозачы, Россияның Журналистер болгаш Чогаалчылар эвилелдериниң кежигүнү, аспирант.
Чурукту интернеттен хоолгалаан.
"Шын" №15 2025 чылдың апрель 24