Үш кижиниӊ ажылын чааскаан кылып турар дээрзин эксперттер тодараткан

Көдээ ажыл-агый талазы-биле күрүне хыналдазын чорудар албан чери-биле сырый харылзаалыг ажылдаары хөгжүлдениӊ оруунга база бир деткимче болур. Ылаӊгыя мал болгаш чер ажыл-агыйлыг республикага, ол чугула дээрзин Тываныӊ Баштыӊы Владислав Ховалыг социал четкиде блогунга бижээн:

«Тываныӊ кызыгаар чоогунда мал ажыл-агыйлыг черлерге ветеринарияныӊ шынарлыг болгаш өй-шаанда дузаалаарыныӊ дугайында айтырыгларны мурнады шиитпирлээри чугаажок. Бистиӊ малчыннарывыстыӊ ажыл-ижинге эӊ-не улуг камгалал турар ужурлуг. Бо талазы-биле кады ажылдажылганыӊайтырыгларын Россияныӊ көдээ ажыл-агый хайгааралыныӊ Тывада, Хакасияда болгаш Кемерово областа – Кузбасста эргелелиниӊ удуртукчузу Сергей Викторович Машуков-биле чугаалаштым.

Республикада чаӊгыс мал эмчизи херек кырында үш кижиниӊ кылыр ажылын күүседип турар дээрзин девискээр эргелелиниӊ эксперттери нормативтерге дүүштүр санап тургаш, тодараткан.

Бо албан чериниӊ эргелелинге хамааржыр мал эмчилериниӊ санын немеп, бюджет хандырылгалыг ажылчын олуттарыныӊ акшаландырыышкынын РФ-тиӊ саӊ-хөө яамызынга барып чедип, камгалаарын олар оралдажып турарлар. Ук албан черин деткип тур бис.

Улуг арат-фермер ажыл-агыйларынга мал эмчизин ажылче киирип алырын саналдаар арга база бар. Кожавыста регионнарныӊ арга-дуржулгазын өөренип көрүп, бо байдалды канчаар таарыштыр уштап-баштаар өске-даа аргаларны дилээр бис».
Р. Демчик белеткээн.