ЭРГИ, ЧАА ЧЫЛ АРАЗЫНДА...
Экизин-даа, багайын-даа деңге сөңнээш,
Эрги чылым – 25 чыл төнүп кагды...
Эрткен чылды чүү деп чүү дээр, мөгейип кааш,
Ээлчеглиг чылды оожум уткуп ор мен.
Сагыжымда салат эвес, салют эвес,
Сагыжымда бодалдарның деңзи караа.
Талыгыр дээр сылдыстары болуп хуулган
Дайынчылар авазының чаштыг караа.
Көрбээн-даа бол, хөлзээзинниг, демир куштар
Хөрээмейни өйлеп-өйлеп тегергилээр.
Частыышкыннар, чалбырааштар көзү чаштааш,
Сагыжымны оя чип кээр – бодандырар...
"...Дайын-чаада, частыышкыннар аразында –
Талыгырда маадырлар канчап чоруур,
Соок-шык черде доңуп-дожап.., кандыг ирги?
Согун октан өршээлдиг бе..?" кылдыр бодаар.
Кандыг-даа өй сүртедирге, түрлүг, дидим,
Хайыралыг чуртун кагбас өгбелер дег,
Камгалакчы маадырлар "чанып"-ла тур,
Караа чаштыг төрелдери уткуп-ла тур...
"Ак, караны деңге чүктеп, чурттаңар!" – дээр,
"Ава-ача хөңнүн бодап, деткиңер!" – дээр,
"Аныяк чаш Маадырларны сактыңар!" – дээр
Амыдырал чонун шылгап, сургап-ла тур...
Шөө-бөрүлер казыргы бооп, бөөлдеп кээрге,
Чөгел төндүр, шөйүндүзү ораашкыже, сүртедиптер,
Төөгүде эрес ады балаттынмас,
Төрээн Тывам оолдары, камнаныңар!
Оран-таңды – Эртинемге тейлеп ор мен,
Одум-көзүм, сарыг шайым өргүп ор мен:
"Төрээн Тывам эзирлери менди чорзун!
Төдү чанып кээр болзун!!! Курай! Курай!".
/ Лидия ООРЖАК.
ШЫПШЫҢ ДҮННҮҢ ӨРГЭЭЗИНДЕ...
Шыпшың дүннүң өргээзинде
Шымбай болуп, одуг ор мен.
Чоок-кавы сылдыс дизии
Чоорту ырап, имистелди.
Бодалдарым үскүлежии
Борбак бажым муңчулдурду.
Каптагайның чаңгыс айы
Карак уштап, хайгаарады.
Көзүлбес күш Октаргайдан
Көзенээмче саарылды –
Оккур бодал ам-на доктаап,
Одуругже хуула берди.
БОДАЛДА КҮС
Долгандыр хар энчектелдир чаап каап-тыр,
«Тоолзуун!» деп бойдус безин бажын чайды.
Сеткилимде күскү эзим хевээр ийин,
Септиӊ эрии, бүрүлер-даа олбук ышкаш.
Туманналган бедик тайга бажы аккыр,
Думаалайын кедипкен-не маажым туру.
Бодалымда күскү даглар хевээр ийин –
Борзаӊ хая-даштары-даа каргыраалаан.
/ Чаяна ШИЛОВА.
* * *
Эргим эжим, оглум, уруум,
Эрге-чассыг уйнуктарым,
Сеткил-чүрээм буян кежиин
Силерден ап, дыңзыг соп чор.
* * *
Чүзүн-бүрүн өңнер холуп,
Чүрээң хөңнүн чуру дизе,
Черге, дээрге чайнап чырыыр,
Челээш өңүн шилип аар мен.
* * *
Хөй-даа эвес каш-ла айда
Көрүшпестиң салдары бе?
Эртен-кежээ чүрээм саргып,
Эргимимни сакты бээр мен.
/ Андрей ХАЛБАЖЫК.
САЛГАЛДАРЫМ, ЧАССЫГЛАРЫМ
Шулуңнашкан чассыг үннери
Шулу ботту өөртүп чоруур,
Чуртталгамның утка-дөзү,
Чулам оду уйнуктарым.
Сайлык куштар, сайдаяктар
Сагындырар, чараштарым.
Салымымның дээди сөңү
Салгалдарым, чассыгларым.
Изиг чүрээм согуушкуну,
Изим базар ажы-төлүм,
Чуртталгаже көрүжүмнүң
Чулуу силер ажы-төлүм.
/ Дарый ООРЖАК.
“Шын №2 2025 чылдың январь 22