Шүлүк база ээлиг дижир.
Бижээчизин шилиир дижир.
Шүлүк ээзи автор эвес,
Бир-ле черде ээрен дээр-дир.
Ажыттынгаш хагдына бээр
Көжегелиг дижир чүве.
Айытканын биживеске,
Киир тыртып апаар дээр-дир.
Тоол база шак-ла ындыг,
Ыдыкчызын шилип алыр.
Ында меге чүве-даа чок,
Тоолчулар чугаазы-дыр.
Ытпас мен деп удурланып,
Аайынга кирбес болза,
Айыыл-халап таваржып боор,
Ындыг чүүлдер турган дижир.
***
Амыдырал база элдеп,
Аландылаан хар-даа ышкаш.
Бирде ак боор, бирде кара,
Билиш чогун чуртталганың.
Аргажоктан күжүң төнүп,
Аргастаныр үелер бар.
Күчү-күжүң көвүдээштиң,
Канчаар аайын тыппастай бээр.
Амыдырал база элдеп,
Чаңгыс черге турбастай бээр.
Чыккылама сооктар-даа,
Аяс-кааң-даа хүннер турар.
***
Аъш-чемге ынакшылым
Аажок-тур деп чугаалаар сен.
Телефонга база ынаам
Дендии-дир дээр кижи болдуң.
Ынакшылым бар-даа болза,
Дириг эвес чүүлдерге
Дыка-дыка ынак мен деп
Ынчаар меңээ чугааладың.
***
Ээнзиргей кышкы кежээ
Элеш кынныр кижи бар бол,
Ыржым-шыпшың тайгада дег,
Ылым-чылым олуру мен.
Дүймеп турган хамык чон-даа
Тарап чорткан ээнзиргейин.
Долгап келир эжим-өөрүм
Дөгере-ле чай чокталган.
***
Төрүттүнүп төк кээп дүштүм.
Төрел чонум дөгерези
Даңгына кыс келир дээнзиг,
Дендии мени манап турган.
Чырык черге чаяаттынган
Чолум-биле оларны мен
Өөрткенимге чоргаарланып,
Өрү тейлеп чалбарыыр мен.
Аңаа чогум мен-даа эвес,
Авам дыка кыскан ийик.
Кадыкшылын бодавайн,
Кызы мени шилээн болду.
Шак ол ынчаар бодаптарга,
Чугаалаар сөс тывылбас-тыр.
Шыдавыже канчаар черле
Четтиргеним илередийн?
/ Ч. Саая.
“Шын” №16 2026 чылдың апрель 30
"Шын" солуннуң МАХ-каналынга каттыжыңар max.ru/join/egenQ...