ЧҮРЭЭМНИ
Чуртталганың шуптузун,
Чурумалдыын, хирелиин,
Шынны болгаш нүгүлдү
Шыдап чоруур чүрээмни!
Өөвүс одун кывыскан,
Өөскүп үнген сеткилди,
Ие болур кежикти
Изеп берген чүрээмни!
Улус чон дээш ажылдаар,
Улуургавас сеткилимни.
Кылыр ишти далдавайн,
Кырым шимчээр бодумну.
Өскелерниң адааргаан
Өштүг кара өжээнин,
Төрел чонум буянныын
Төдү көрүп чору мен.
Тиккиледир соккулаар
Дидимненген чүрээмни.
Чүрээм салган кыйгызын
Чүгле бодум дыңнадым.
/ Ирина ОЮН.
* * *
Айдың чырык өртемчейде
Ажыы чок деп кижи турбас.
Чаа, чараш, эки чүүлдүң,
Чаартыкчызы кижи ол-дур.
Бистер шупту ажыктыг бис,
Бичии чаштан кырганга дээр.
Аң-мең, куш-даа, араатан-даа,
Ажыктыг бооп чурттап чоруур.
/ Самбый ШОРААН.
Ак-Довурак хоорай.
* * *
ООДА БИЛИП ЧОРУУР ДЕП БЕ?
Эрге-чассыг, чечектиг май база катап
Эргилип кээп, чечээн чадып, көөргетсежок,
Эриг чүрээм эргип четпес ханызында
Эрги балыг сорбузу чоп чымырады?
Чалыы шаамның хандыкшылы чараш кыска
Шак бо майда душкан болгаш, ынчаары ол бе?
Дуруяалар, аңгыр, кастар чалгын чайып,
Тулаа-шыгын эргий ужуп, ырлашсажок,
Көксү-хөрээм көрүп четпес булуңунда
Хөөнзүргей кударал чоп хөрлээледи?
Сөзүн бергеш, ээ болбаан шак ол кыска
Сөглеттинмээн хомудалдың уржуу чоор бе?
Эрге-чассыг, чечектиг май хүннериниң
Ээлчээ эртип, июнь-биле солчу бээр.
Дуруяалар аяс дээрге кылыйткылап,
Турлаг шыкка эжеш болуп, ээлеп чайлаар.
Чаңгыс-ла мээң чааскаанзыргай салымымны
Чараш ол кыс оода билип чоруур деп бе?
/ Аржаан ЧАШ-ООЛ.
* * *
Төрээн черим эргий көрүп,
Төлү мени танызын дээш,
Бөргүм уштуп, бажым суйбааш,
Мөгейбишаан мендилештим.
Сырый үнген аргалары,
Шыктыг делгем ховулары
Ыржым тыртып оожургаан,
Ыыт-дааш чок удаанзыргай.
Шак ол өйде удуп чадаан,
Шаалаан Сой хем саарыглары
Чараш уян өпей ыр бооп,
Сарынналыым оожургатты.
* * *
Бо-ла дүне канчаарым ол?
Могап шылааш ынчаарым бе?
Мага-бодум өлүг эът дег,
Базырныгып баксырадым.
Кызып-кызып холум сунгаш,
Кышкырдым-даа, үнүм тунук.
Кызаа хааржак куспаа дыңзааш,
Кызыл тыным алыр часты.
Дүнекиниң караңгызы
Дүвү чок дүмбей тамы.
Дүвүренчиг, кижи коргар,
Дүштер дүжээр үе ол боор.
/ Андрей ХАЛБААЖЫК.
“Шын” №31 2026 чылдың август 13
"Шын" солуннуң МАХ-каналынга каттыжыңар: max.ru/channel_shyn