Ыржым эртен
Ыржым эртен ырак черже аъттаныптың,
Ак сүт чажып, аалымдан үдеп каан мен.
Ундаргай хөөн сеңээ, меңээ ынчан турбаан,
Уран ырлар сеткиливис каастап турган.
Кааң хүндүс чаңнык даажы чыжырт диген,
Хаттыг-чаъстыг шаажы болуп улуп келген.
Сеткил каастаан уран ырлар үстүп калган,
Сен-даа, мен-даа ужурашпайн чарылдывыс.
Ыржым эртен ынаам сени сагынгаштың,
Ыыт чок ор мен... Ыржым эртен.
Лидия ООРЖАК
Камнаайн, авай
Эгиннериң аар чүъктү угбас-даа дээр,
Эрги шагның хоозун сүзүү эсти берди.
Эриг баарлыг, чылыг холдуг мээң авам,
Эң-не эргим, эң-не чараш даңгына сен.
Ава кылдыр мени чаяан кежииң-чажыын
Адыш долдур ажы-төлге үлеп чор мен.
Кенен сеткил азы ажыг аак-биле
Хензиг-даа бол, сээң чүрээң кергетпес мен.
Боду билбес хуулгаазын күшсенде-дир деп,
Бодум ие болу бергеш, ылап билдим.
Суларавас борбак чүрээң чаңгыс согуун
Суглуг караам огу ышкаш камнаайн, авай.
Татьяна КУШКАШ
Херээженнер
(Баштак)
Хевирленип, каастаныпкаш, базыптарга,
Херээженнер кайгамчыктыг чараш улус.
Херелденген хоюг, чымчак көрүжүнге
Хертеш эрлер ала-чайгаар алзы кааптар.
Хендир, ине, чүскүк туткансанында-ла,
Херээженнер кайгамчыктыг шевер улус.
Хээлендир сырып даараан ширтектерге
Херлип, көстүп, эрес эрлер аңдаштаныр.
Хемчээттинмээн улуг иштиң ээлери
Херээженнер кайгамчыктыг хөглүг улус.
Хеймеринге бараалгаткан ыры, шүлүүн
Хедер эрлер таалап дыңнааш, уяраарлар.
Екатерина КАЛГА-ХӨӨ
Хек-даваннар
Часкы үе моорлап келди,
Чагган хар-даа эрип батты.
Канандыда хек-даваннар
Каастаан хову таан чараш.
Ак-көк өңнүг хек-даваннар
Аас-кежик сүзүглели.
Аныяктар ынакшылы,
Ажы-төлдүң өөрүшкүзү.
Часкы чывар соок-даа бол,
Частып үнер хек-даваннар.
Дидим болгаш шыдамыккай,
Дирлип үнер хек-даваннар.
Бичии-Уруг КЫРГЫС
“Шын” №18 2024 чылдың март 9