Үлежиили
Оожургалды бичии-даа бол күзевес мен,
Олутпайзыг чуртталганың херээ чүү боор.
Чүгле боттуң думчуун харап, хүнүн бодап,
Чүшпеңейнип, элейтип-ле чорааш канчаар.
Багай чүүлдү көргештиң-даа, оюп эрткеш,
Балазы-ла халдай бээр деп корткан ышкаш,
Бажыңдыва караш кыннып, чашты бергеш,
Маажым, шөлээн шайлап орган ажыы бар бе?
Танывазым кижи-дир дээш, билбээчеңнеп,
Таваар эртпе, сагыш човап, дузаны кат.
Кижилерниң аразынга чурттап чорааш,
Хилег-түрээн, ажыг-шүжүүн үлежиили.
Күзелдерни оттурбаалы
Чеже суглар, чеже хемнер акпаан дээрил...
Сеңээ душ бооп таваржып кээр, солун-на-дыр.
Кезек када сеткилимни доюлдургаш,
Хемнер кежир, арттар ажыр чоруптар сен.
Имирерген карактарың кыйгырза-даа,
Ырларыңның аялгазы хөлзетсе-даа,
Идегелдиң имистелген көзү чок деп,
Ийе харын, кайывыс-даа билип ор бис.
Ону чоор сен, допшулуурга ойна-ойна,
Оода чүрээң чалынынга чыннып алыйн.
Кударалдың, сарынналдың херээ чүү боор,
Кудук-чайык, каткы-хөглүг хөөреп ор даан.
Сагыш-сеткил бар-даа болза, салым аңгы,
Чажыртынган күзелдерни оттурбаалы.
Шак бо делгем өртемчейге дужар кылдыр
Чаяап кааны, хензиг-даа бол, кежиивис-тир.
Ольга САЛЧАК.
Чадаана.
«Серебрянка»
Хөлегелиг хады, шиви үнген
Хөлчок улуг девискээрлиг,
“Серебрянка” санаторийге
Секпередим, сегидим-даа.
Эмчилерниң, сестраларның
Эргим-чымчак карактары,
Эптиг-ээлдек аажы-чаңы
Эриг баарлыг аваныы дег.
Санитарка чараш кыстар
Салгын ышкаш чиик адак,
Аштап чуп кааптарга,
Арыг-силии кылаң-на тас.
Поварларның чемгерерин
Борбак хырын харын шыдаар.
Аяк долдур куткаш сунган
Аъжы-чеми сүүзүннүг.
«Серебрянка» санаторийге
Чеже кижи дыштанмаан дээр.
Четтиргеним илередип,
Чедиишкинни күзеп чор мен.
Кызыл-Уруг САНЧАТ-ООЛ.
Дус-Даг суур.
Чадырлыг-Хем
Тайга-сыннар ортузунда аяң черде
Далаш чокка, таваар туткан чадырым бар.
Дыттар, пөштер, хадың, шиви хүрээлепкен,
Дыка чараш, тоолда дег, онза черде.
Чадыр тиккен хүнүвүстен ол-ла черни
“Чадырлыг” деп ону олчаан адай берген.
Чадаг, аъттыг аңчыларның кокпа оруу
Чадырлыг-Хем унун өрү шөйлүп чоктаан.
Ак-ак баштыг бедик-бедик тайгалардан
Агып баткан арыг-кылаң кара суг бар.
Чайын, кыжын чеде бээрге, дүне-хүндүс
Чараш ырын үзүктел чок ырлап чыдар.
Грин КЫЛЫН-ООЛ.
Арыг-Үзүү.
“Шын” №30 2024 чылдың апрель 20