ЫНАКШЫЛЫМ
Ынакшылым, частың башкы чечээ ышкаш,
Черден үнгеш, ону каастаан үнүш эвес.
Ырак дээрде чивеңнежип чүгүрүшкен,
Чедип болбас орай дүнгү шолбан эвес.
Чанын орта чорзумза-даа, амдыгаа дээр
Чараш кыска сөглеп чадаан бодалым-дыр.
Чайжок кады сагыжымга бо-ла кирер,
Чалыы шаамның чаяап берген аарыы-дыр.
Эргим уруг, дужуп келгеш, хүлүмзүрүүр
Эргелелдиг чырып кыпкан шырайы-дыр.
Ажыл-ишке күжүм чүглеп, сорук киирер,
Арыг-шынчы кыска берген күзелим-дир.
Ынакшылым, соок кээрге, кыштан дезип,
Ырак черже ужуп чой баар куш эвес.
Адышка өй чүрээм орта сыңмайн баарга,
Ажыдыптар эң-не күштүг даңгыраам-дыр.
Кара-оол НАТПИЙ-ООЛ.
* * *
Бедик дагдан шурап баткан хемчигештиң
Белдир черге бир-ле хемге катчыры дег,
Мээң чалыы базымнарым барза-барза,
Меңээ сени белек кылдыр башташтырды.
Шапкын аккан чалыы өйнүң хемин куду
Саат чокка салдап чораан мээң хемем
Салымымның өртээлинге доктаай бээрге,
Сарыым-дыр деп, чүрээм сени танып кагды.
Карактарың көрүжүнде – чалгаан далай,
Каттыраңнаан шырайыңда –
чайыннаан хүн,
Чассып келир уян үнүң – хамнаарак куш,
Сагыжымда, бодалымда чүгле – сен сен.
Ынакшылым, чассыг эжим, менче көрем,
Ындынналган чүрээм ырын сеңээ сөңнээйн.
Ынак мен деп ийи сөстен сиилбиттинген
Ыдык, өндүр даңгыраамны сеңээ берейн.
Эрик ДОНГАК.
ЧҮГЛЕ СЕН СЕН
Аараанымда хаваам орта сала кааптар,
Адыжыңның хоюг-чылыы эм-дом-на ийин.
Аакталган оглуң мени ол-ла дораан
Ала-чайгаар сегидиптер чордуң, авай.
«Уду, оглум, эртен оттуп келириңге,
Ужу-бажың анаа апаар, ажырбас» — дээш,
Орунумга ондап-остап чыдырымда,
Оглуң мени артыжап каар чордуң, авай.
«Саат чокка изии-биле аартавыт» дээш,
Саарып-саарып хайындырган
сүдүн сөңнээр,
Эң-не күштүг айыс-домнуг тынгарыкчым
Эргим авай, ынак авай, чүгле сен сен.
09.02.2024 ч.
Буян ЕНДАН.
ХӨӨНҮ ЧОККА...
Хөгжүм херекселдериниң хөөн эдикчизи Буян Ховалыгның чырык адынга
Хүрең өңнүг фортепианомга
Холуң-биле нота ойнааш,
Хөөнү арай хирелиг дээш,
Хөөннеп бээр деп аазаан сен.
Аазааның бүтпейн барды,
Аза-четкер үзе кирди.
Алдыы оран бурганнары
Арай эрте кыйгыртыпты.
Чонувуска буян-чолдуг,
Чоргааранчыг адың арткан.
Хүрең өңнүг фортепианомга
Хөөнү чокка ойнап чор мен.
Александр САМДАН.
«Шын» №20 2024 чылдың март 16