ДАМДЫ БЕЛЭЭМ
Чанып келген куштуң үнүн дыңнаарымга,
Сакпак адаа саргып келир – сарынналыг.
Чалыы шаамны чалгынынга алгаш барган
Чараш эжеш аңгырларым көзүлбейн-дир.
Авайымның өпей ырын сактып шыгжап,
Амыдырал аар аагын чүктеп чор мен.
Акшый берген назынымның идегели –
Ажы-төлүм, уйнуктарым хүлүмзүрүү.
Аргамчының быжыг доңун чешпээни дег,
Ажылымда четтикпээним чүүлдер-ле хөй.
Чүрээм ыры, хөңнүм ыызы – дамды белээм
Шүлүктерим чонум-биле кады чоруур.
ЧАНАЙН
Кызыл-Даамның артыш чыдын хандыр тынмайн,
Кызыл-даван чашкы шаамны дозуп албайн,
Төрээн черим төөгүзүн чедир билбейн,
Төөреп тенип, каяа түреп чорааным ол?
Эргим авам чевег-хөөрүн эргивейн,
Дагылгалыг Оваамдыва чажыым чашпайн,
Ээн ховаа чуукталган каңмыыл ышкаш,
Талыгырга каяа улчуп чорааным ол?
Сагынганым, эриин ажыр дажаан хемим,
Салга салдап, эштип кежер аргазын тып,
Шаптараазын берге оруун ажып эртип,
Чанайн, чанайн, аъдым дүрген эзертээйн.
Тараа ОССУР,
ТР-ниң чогаалчылар эвилелиниң кежигүнү.
* * *
Саарлып баткан сарыг бүрү
Черни шыпкаш, чаттып чыдыр.
Чайгы чараш хевин чоктаан
Самдар арыг муңгак туру.
Алдын күзүм чеди өңүн
Аралаштыр чашкан тудум,
Алаак-шыкта шарлан, хадың
Аяс хүнде чүзүн-баазын.
Чурукчу күс өңнеп чураан
Чуртум каазын магададым.
/ Андрей ХАЛБАЖЫК.
“Шын” №74 2024 чылдың сентябрь 28