КҮСКҮ БОДАЛ
Хадымырлаан соок хүнде
Хайыы черде кара чааскаан,
Хенче карам сени үдеп,
Холум чайып туруп каан мен.
Ырак черде эжим бодап,
Ынакшылым киткеп чоруур.
Чылдар эртип, шылгалда боор,
Чүрээм сени кайын уттур.
Куурарган хову черде
Куу чашпан чуглуп бар чор.
Куюмналган сагыш-бодал
Кударанчыг апаар чүзүл?...
/ Маадыр ОНДАР.
Кызыл хоорай.
КАШПАЛ КЫЗЫ
Кадыр тевер сарлык малы
Каш сын ажыр тояап оъттаан.
Караңгылап орайтаан бол,
Кашпал кызы оларны көөр.
Чуглуп чыдар көшкелерни,
Чуңма, тениң анайы дег,
Коргар-сестир ужуру чок,
Козурадыр маңнап эртер.
Эзир куштар уя туткан
Эңгимелиг шорааннарга
Ам-даа өрү ужугар дээш,
Агаар чарган хартыга-ла.
Кадыг-шириин бойдузунга
Кара чаштан дадыккан кыс
Кочурумнаан шуурган тоовас,
Кожамыктап ырлап чоруур.
Хөөрежирге, уян хөөннүг,
Хөглүг-баштак аажы-чаңныг,
Эрлер чүрээн чымыраткан,
Эрес, чоргаар кашпал кызы.
/ Бүрбү СЕРЕН.
КЫРГАН-АВА ӨӨРҮШКҮЗҮ
Хендирбе дег тутчу берген төрел-дөзүм,
Хертеш, чоргаар, эрес, кежээ Монгуштарым!
Ажы-төлүм чаяаттынып бодарааны,
Ажык сөстүг, оюн-баштак Ховалыглар!
Ужар-хеме соонда ыш дег шөйлү берген,
Уругларым, уйнуктарым, төрээннерим,
Алгы эттеп, тыва хевин даарап кедер,
Аъш-чеми сүүзүннүг кеннээттерим.
Алдан дөртке салыптарга, девип самнаар,
Аваангырлар – акыларым, дуңмаларым.
Акым болур мөге Сүүр-оол – мөңге төөгү,
Аразында ам-даа шүүп каап чоруур ышкаш!
«Дүнсэн тамхи» кыдат таакпы чырыктапкан,
Дүүрге боозун аштап, чушкуур аңчы ачам.
Шүүче, балды, бижек-кестиин чидитпишаан,
Шеверленип, чазанып каап чораан чүве...
Одарында өдек-кажаа сыскып чушкаан,
Олут орбас, ишчи авам чараш-ла ийин…
Ооругда чаттылып оъттаан өшкү, хоюн
Оожум дозуп, чаңгыландыр ырлаар чораан…
Каргыраалап, хөөмейлеп каап, сыгырты бээр,
Кайгал, дидим, аътка челзир чуржааттарым.
Шевер ачам дөзеп уктаан, чазап чонар,
Кыпкан хоюг карактарлыг дуңмаларым!
Чаңгыс кызым чалгын-чакпам, тынган өкпем,
Самбың санаар, хөгжүм ойнаар салымныг кыс!
«Катыш» диген, «кат-ией» дээн, чуржумайлаан,
Кайгамчыктыг чазык, чончу оглум – күдээм!
Ноутбукка, компьютерге олурупкаш,
Номчуттунуп, онаалгазын ыяап кылыр,
Уран чүүлге, культурага салымныг бооп,
Уйнуктарым кырган мени өөртүп чору!
Аныяктар, эжим-өөрүм аразында
Аяннанып, чоргаар чурттап чору-ла мен.
Аяс дээрим, байлак чуртум, ынак чонум,
Алдар тудуп, четтиргеним илереттим!
Раиса Ховалыг.
Кызыл хоорай.
«Шын» №94 2024 чылдың декабрь 7