«Шын» 12+

Шүлүк кыдыраажындан

18 ноября 2026
5

ХАРДА ЧАГААҢ ИЗИ-ДИР

Салым-чолдуң оруктары кадыр-дыр,
Сагыш-чүрек саймааралы берге-дир.
Күскү дээрниң муңгак хөңнү дээштиг-дир,
Күзелдерниң четтирбези кончуг-дур.

Сарыг бүрү дүжүп турар үе-дир,
Саазын ышкаш хадый берип болур-дур.
Кударанчыг, ыглаксанчыг апаар-дыр,
Кудай-биле чаржалажыр мындыг-дыр.

Баштайгы хар чааптарын манаар-дыр,
База катап сеткил чырып келир боор.
Болчаг черде харда чагааң изи-дир,
Бодум ынчан харыы бижиир, ындыг боор...

Дарый ООРЖАК.

ЧАА-ХӨЛ

Чаа-Хөл дээрге чечектелген торгу шынаа,
Чалыыларның ойтулааштаан айдың болчаа,
Дыңгылдайның, хөөмейниң аялгазы,
Тыва чуртум чурумалдыг бойдус байлаа.

Чаа-Хөл дээрге кадыр даглар кашпалдары,
Хая кырлаан чуңма-телер турлаглары,
Чайынналып хээленген далай чалгыы,
Кажан шагда Чиңгис-Хаанның кокпалары…

Чаа-Хөл дээрге хову-шөлдүң хорагайы,
Сыннар эдээ малчыннарның чайлаглары,
Чаяап төрээн авам, ачам төрел аймаа,
Чырык черге аас-кежиим хайыразы.

Буян ЁНДАН.

“Шын” №44 2026 чылдың ноябрь 12

"Шын" солуннуң МАХ-каналынга каттыжыңар: max.ru/channel_shyn

ШЫН Редакция