Шүлүк кыдыраажындан

АВАМ ЧАЯАН ӨТКҮТ ДЫЛЫМ
Домактажыр, сеткил эмнээр
Төрээн дылым сүзүүм, эмим.
Төөгүмнү улап, шидиир
Төрел чонум угу, дөзү.

Ынакшылды, кударалды
Ындын ырлаар тыва дылым.
Аккыр малга дайгы салыр
Авам чаяан өткүт дылым.

Арга-эзим, хемим үнүн
Аяннаштыр шоор ойнаар,
Ааткыышта төлүм чайгаан
Аагай, уян тыва дылым.

Тыва кижи дылын утса,
Дыңгылдайын канчап ырлаар...

УЙНУКАЙЫМ
Аалымның матпадаа,
Авазының сайдаяа,
"Авай" деп кээр чыпшык кыс
Аажок эрес уйнуккай.
Аскым кежиин хайырлаан
Аажок кежээ сырбыкбай.
Акшый берген назыда
Айбылаарым кежээкей.
Билиг-эртем чадада
Билбези чок кежиккей.
Өөрүшкүм чүшкүрер
Өдээм-аалым хөкпежи.
Чанып келир кушкажым
Чажым, уруум, чолдугбай.

КУШТАР БАЗА ЧАНЫП КЕЛДИ...
Частып үнген бойдус-биле
Чаржалашкан хунук хөңнүм,
Сеткилимниң кыйгы ыдыы
"Сергек бол!" деп көгүтсе-даа,
Хары черде дайын-чаада
Хеймер оглум манап, хилээн.

Харлыг кыжын аалдан үндүң,
Хайыра чок кыржаң туржук...
Чанган куштар эдер-ле боор,
Чанып кээр сен, манап ор мен!
Бажыңыңның эжии ажык...
Башкы көктер шымыраарды...
Апрель 24, 2023 ч.

ЧАНАР ОРУУН ЧАШ ХАР ДУГЛААН
Дайын-чааның уржуу бе, ой,
Таңдым-черим канчап барды?
Бай-Тайганың ээзи кадын
Балар-чоткан, дүвү салды...
Частып орган бойдус кудаан:
Чытпыш талдар хараган дег,
Өл хар шуглаан аал өдээ
Өле туман аржыылданды.

Чаъс, хар улдап канчаары ол?
Чаа-дайын уржуу-ла боор.
Өске черге бажын салган,
Өлчей кежиин оон тыппаан
Чалыы оолдар кыйгызы бе?
Чанар оруун тыппааннар бе?...
Май 6, 2023 ч.

Наталья САЛЧАК,
Тываның чогаалчылар эвилелиниң кежигүнү, Бай-Тайга кожуунда “Мөңгүлек”чечен чогаал болгаш хөгжүм каттыжыышкынының удуртукчузу.

"Шын" №34 2023 чылдың май 13