ЧАА ЧЫЛДЫҢ БҮДҮҮЗҮНДЕ
Дээрде сылдыс
Демин менче карак базып,
Изигленме, шупту чүве анаа боор деп
Идегелди оттурдуң-даа.
Чагган харлар
Сагыш агы бис дег ак деп
Саймааралга алзывыткан сеткилимни
Сагыш човап оожургатты.
Хыраа, хыраа
Хырааланган арга күжүр
Кылаңайнып чараш көстүп,
Кывыскы бооп көзүлдү-даа.
Ынчалза-даа сеткил хөөнүн
Ырак дээрде сылдыстар-даа,
Чап чаа чагган харжыгаш-даа,
Чымчадып ап шыдавастар.
Чүгле харын Чаа чылда
Чаражым сээң карактарың
Чааскаанзыраан эжиң мени
Чаглак болуп чылыдыптар.
Галина БУРБУЧУК.
ӨӨРҮҮР МЕН
Алдын хүнүм чайыннап кээр,
Аӊаа өөрүп амыраар мен.
Ажыл-ижим бүдүргештиӊ,
Аӊаа өөрүп амыраар мен.
Чаш төл менче хүлүмзүрзе,
Чаптап, ошкап чассыдар мен.
Чассыдыгдан, эргелелден
Чаштыӊ чүрээ өөрүүр боор.
Чашкы шаамда өөрүм-биле
Чаӊгыс эвес дужуп кээр бис.
Сактыышкынныӊ уламындан.
Чашкы шаам дег өөрүүр мен.
Ажы-төлүм, арат чонум
Аралажып чурттап чоруур.
Катаптанмас чуртталгада
Канчап черле өөрүвес боор.
ХӨГЛҮГ ЧОРУ
«Экиилежип мендиле» деп,
Эртенги хүн чайнап келир.
Хүнүм күштү, сорукту бээр.
Күзелдерим бүдүп чору.
Чараш чечээм черим байлаа
Сагыжымны хөгледип чор.
Чемгерикчи бойдус черим –
Сеткил-хөөнүм киирикчизи.
Хүреӊ, кызыл шырайларга
Хүлүмзүрүг чайнап чорзун.
Акы-дуӊма улус чонга
Амыр-тайбыӊ делгерезин!
Анчымаа МОӉГУШ.
АНАА СҮМЕМ
Шүлүк бижип чадай бергеш, муӊгарава,
“Шүүттүүн” деп улус чонга чарбыттынма.
Сүме берген кижилерден түвексинме,
Шүгүмчүлел ажыын база амзап чору.
Дужа-келбе сөстер сүрүп, эшкеневе,
Душ болган одуруг деп могаттынма.
Сеткил-чүрээӊ, ишти-хөӊнүӊ дыӊнап өөрен.
Сергередип кээр бүдүш барын утпа.
Частырыг чок бижизиӊзе, өөрүп чору,
Чазыгларыӊ катап-катап эдип чаза.
Дески черге чандыр баскаш, тайып болур.
Дериӊ төккеш, үүлеӊ бүдер, манап ап чор.
Чүгээр шүлүк бодараткаш, хөрээӊ чайба,
Чүден артык салымныглар ховар эвес.
Сүрүштүрген домактарым тоовайн барба,
Сүме бижээн домактарым номчуп сайгар.
Дуржулга чок, аныяк дээш дүжүп бербе.
Тулган чогаал ээзи болур үеӊ келир.
Човаг-шылаг чилчииӊ үзүп, түредип кээр.
Чогаал оруу, кымга-даа бол, кээргел чок-тур.
Юрий ТУӉ-ООЛ.
ТЫВА ЭР МЕН
Тоолдарның маадыры дег,
Торгу хептиг тыва эр мен.
Тонум хээзи бир-ле тускай,
Дордум куру оон-даа онза.
Доңнуг чараш угулзалыг,
Дошказында кежик домнаан,
Одагалыг чиңзелиг бөрт
Овур киирген тыва эр мен.
Каптагайже өрү көрген
Кара былгаар кадыг идиим
Хере тепкеш, чоргаар-ла мен,
Херелденген тажы-ла мен.
Хүлер, мөңгүн кызыткыыштар
Хүрең-Дайым бажын каастаан.
Оттук, бижек астып алган
Орлан, эрес тыва эр мен.
Светлана ОНДАР.
«Шын» №100 2023 чылдың декабрь 30