ПАИН САА (А.А. БАИНОВ)
Хакас дылдан тыва дылче Чаяна ШИЛОВА очулдурган.
Кыш келген
Бо хүн бисте кыш келген,
Бораң шуурган кѳдүрүлген.
Бора дииспей диленген:
– Даваннарга идиктен,
Угулзалыг хол-хаптан,
Улуг эвес негейден
Дииспей меңээ бериңер.
Хаак ыяшты тудупкаш,
Хар оруктап эжимче
Халып, аалдап четкеш кээйн.
Мактанчак дииспей
Мээң диизим соксаал чокка
Менээргенип мактаныр:
– Дииспейлер аразында
Дендии чараш угаанныы мен.
Эптиг, чымчак идиктиг мен.
Эң-не силиг, чараш тоннуг,
Чайынналган сыргаларлыг,
Чараш мөңгүн билзектиг мен.
Хөрээм каастаан чинчилерлиг,
Хөйлеңим-даа торгу-маңнык.
Хөгжүм ырым сонуургаар дээш,
Хөй-ле чонум чыглып келир.
Адыш часкап, алгыржырлар:
— Ах! Тергиин-дир! — деп, өөрүүрлер…
Че!!!
Тырлаашпай
Тырлаашпай-даа удуваан,
Чадаганын хѳѳннээш, ойнаан.
Чалгааратпайн, дүннү ѳттүр
Тоолдарын ыдып хонган.
Кундус
Чидиг-чидиг диштерлиг,
Чиге, топтуг көрүштүг.
Хөөлбекти ол кылыптар,
Хөй-ле ыяшты белеткээр.
Чидиг хирээ дижи-биле
Чудуктарны кезип кааптар.
Хөлчок улуг хемни боогдааш,
Хөлчүк кылдыр хуулдуруптар.
– Аажок шевер кундус-тур – деп,
Аал чону кайгап мактаар.
“Шын” №12 2024 чылдың февраль 16