Марина ЦВЕТАЕВА
(1892 – 1941)
Бодумнуу деп билбейн чорааш,
Фонтан суунуң чаштанчызы,
Ракета оттары дег,
Бижип кааным чогаалдарым...
Уйгу, таакпы өрээлинче
Шургуп кирген азалар дег,
Чалыы назын, өлүм бижээн,
Номчуттунмаан шүлүктерим...
Садыгларда доозун бүргээн
(Кым-даа ону албаан, албас);
Үнелиг чаа арага дег,
Үе-шагы, ээлчээ келир.
1913 ч.
Дээрде база бодум хөрээм иштинде бар
Ийи ол хүн өжүп бар чор, о, бурган, өршээп көрем!
Шак ол хүн дег, бодумну мен кээргээр мен бе?
Шак ол хүннер төөредип шаг-ла болду.
Өжүп калды – херелдери аарышкы чок,
Эң-не изии баштай өжүп, хөмүререр.
1915 ч.
УЖУРАЖЫГ
Кежээки ыш хоорай кырында көстүп келди,
Ырак черже вагоннар-ла чөпшүл чуулган.
Анемондан артык кылаң чашкы шырай
Хенертен-не соңгаларның бирээзинде көстү каапты.
Кирбиктерде хөлегелер. Дүжүлгениң бөргү ышкаш
Дыдырарган чаъжың дүгү... Алгым биле
Чоовуурувус өлүглерни оттуруптуп болур дээрзин
Шак бо хензиг үе-шакта билип кагдым.
Караңгылаан соңгада ол шак бо кыска
Хайым чоннуг вокзал орта көргеним дег хуулгаазын
Дүш-түлдүң оранынга ужураштым.
Ол чүге арай муңгак көстүрү ол?
Кылаң хөлге чүнү дилеп турганы ол?
Дээрде база аңаа кежик турбаан магат.
1910 ч.
Очулга Сайлыкмаа КОМБУНУУ,
Россияның чогаалчылар эвилелиниң кежигүнү.
Чурукту интернеттен алган.