Вадим ЧЫКАЙ,
Тываның чогаалчылар эвилелиниң кежигүнү.
ЧАҢЫМ ПӨРҮК
Одуруглар аразынга,
Оргу шөлдер ортузунга
Хөөмей-ырым чаңгыланза,
Хөрек-чүрээм сарынналза,
Улажывыт, черле кортпа,
Углаан дының шеле сокпа.
Тайга-сыннар баштарынга,
Даглар, хемнер уштарынга,
Каргыраамны дыңназыңза,
Кадыр арттан дыштанзыңза,
Коштунчувут, сүрээдеве,
Коргуп-иргип, девидеве.
Ээлиг черге чорааныңны
Эштериңге сөглээниңден
Чөгенир мен, күжүр өңнүк,
Чөргектиимден хөңнүм пөрүк:
Эгениичел күжүр бодум
Ээн черге ырлап чордум.
ДОЛААНАМГА КАЙЫН ЧЕДЕР
Долгандыр-ла уругларның
Доозазы чараш-даа бол,
Дозурарган карактарлыг
Долаанамга кайын чедер.
Домчу-эмчи даңгыналар
Доза туруп, “шинчиир-даа бол”,
Доңган баарым чылыдып бээр
Долаанамга кайын чедер.
Торгу тоннуг кадыннар
“Дозуланып” чагдынгаш-даа,
Долаан бурган чаяап берген
Долаанамга кайын чедер.