ЭКИИ, БАШКЫ!
Кушкаштарның ырын дыңнап,
Кудумчуга маажым базыптар сен.
Өрү-куду шуушкан чонуң,
Өөреникчиң менди эрээр:
– Экии, Башкы,
Эргим Башкым!
Танывазың бир-ле черге чеде бергеш,
Даамай, кичээп, базыптар сен.
Ужурашкан улузуңнуң албан бири
Уруг чашта доозукчуң холун сунар:
– Экии, Башкым,
Эргим Башкым.
Алдын күзүң бүрү саарып,
Аяс дээриң чырыың шаңнап,
Харлыг даглар мөгейип тур,
Кандыг кончуг кежиктиг чоор.
Башкы кижи хүндүткелдиг,
Байгы ижи – үнелелдиг!
/ Меңги ООРЖАК.
МЭЭҢИИ
Шак бо даглар, шак бо бедик сыннар мээңии,
Шаттар болгаш хову-шөлдер – шупту мээңии,
Төнмес ырлыг хемнер-хөлдер база мээңии,
Төрээн черниң бүгү каазы, байлаа – мээңии.
Хүннүк черни чыыра тыртып, челзип орар
Хүлүк бора чүгүрүктер шупту мээңии,
Хөрек-чүрек бузулгу дег уяранчыг
Хөөмейжиниң сыгыды-даа база мээңии...
Союп каапкан, балыгланган черлер мээңии,
Човулаңныг, түреп чоруур чон-даа мээңии,
Хараадалдан ыглап чоруур сеткил мээңии,
Харлыктырган карак чажы база мээңии...
Өндүр чуртум, өргүн чонум – силеримниң
Өөрүшкүңер, аарышкыңар – шупту мээңии.
/ Сайлык МОҢГУШ.
КҮС-БИЛЕ ЧУГАА
Күзүм дүштүӊ. Күзеведим. Манавадым.
Күзелдериӊ бүттү бе деп айтырбадыӊ.
Кударалыӊ соӊгам соктап тура хонду.
Куруяк чайым база бар дээш киирбедим.
Кылыктанган чывар-соогун чыып алган
Кыжым база кырлаӊ ажыр мени манаан,
Кыламазын тайып ушпайн, эрте бээр мен,
Кызыл хүнүм кыйгырарыӊ эрте дээр мен.
Чааскаан калган аӊгыр кужуӊ эвес-тир мен,
Чаъзыӊ салып, сагыжымны шеневейн көр.
Часты, чайны шаам-биле уткуп аар мен,
Чаӊнап турбайн, шала дүрген эрте бер, күс.
/ Юрий КУУЛАР.
* * *
Кыяр-өлең бүрүзүнде
Кылаңнашкан шалың суу дег,
Эң-не арыг сеткилиңниң
Ээреминде эштип чор мен.
Кады душкан хүнүмден бээр
Каткы-хөглүг чурттап чор мен.
Эскен чемиң үстүн амзаар
Эжиң болгаш, өөрүп чор мен.
/ Тимур КАДЫН-НАВА.
«Шын» №78 2024 чылдың октябрь 12