Дайынчылар поездизи
Балыглаткан дайынчылар чүдүрүп каан
Вагоннарын аары кончуг сөөртүп алган,
Хөйнү көрген поезди-даа дүннү уткуй,
Човуртаан дег, кускуннап каап чоруп олур.
Орук дургаар төнчү чокка дистинчипкен
Хоорайларда эмчилерге дүжүрерге,
Балыг эрлер бистер-биле чарлып тура,
Байырлашкаш чоруптарга – баар ажыыр.
Өртээл санай дайынчылар дүшсе-дүшсе,
Өөрлеривис эвээжээн-дир, вагон хозаан.
Бичии-даа бол, тиилелгени чоокшулаткан
Дайынчылар сегип үнүп келир болзун!
Кадыг-дошкун тулчуушкундан чалданмайн,
Өскелерниң артындыва чаштынмаан силер!
Каң дег быжыг кадыкшылды күзеп каалы,
Өөңерге онча-менди чанып кээр силер.
Байлак САТ.
Январь, 2023 ч.
Чажыын чажар чүгүндүве
Ада-ием чылдың келир чайлаглары:
Алдыы-Үзүк, Үстүү-Үзүк, Борбак-Арыг.
Өгбелерим хөлбең оъттуг хонаштары
Өлең-шыктыг, аржаан-суглуг чыдары бо.
Алызындан малчын уктуг Артааларның
Ажы-төлү, салгалдары аалга сыңмас.
Алаак долу, ол-бо чүкте оъттаан малдың
Анай-хураганы ында-мында дешкилешкен.
Амыдырал агымының ылгынын аар,
Ада-ием биеэгизи чок, кырый бээрге,
Аар-саар күзээшкиннер аазавайн,
Ам-даа үр-ле чурттаарын йөрээп каан мен.
Амы-бойдус хоойлузундан эртер эвес,
Амы-тынның хүнү кээрге, канчаар боор ам....
Даады-ла чажыын чажар чүгүндүве
Тариназын номчуй-номчуй “аъттанганнар”.
Маадыр-оол АРТАА.
Чаңгыс-Дыдым
Чараш ногаан, чидиг ине бүрүлерлиг,
Саглагар, чоон-чоон быжыг будуктарлыг,
Калбак шыкта кара чааскаан бедий берген,
Хараганнар аразында өзүп тур сен.
Ыржым чайгы кежээлерде адааннажып,
Ырак эвесте сенче маңнап, чаржыптар бис.
Хөглеп ойнап, халып, шурап, хүрежир дээш,
Хөй-ле оолдар сеңээ бо-ла чеде бээр бис.
Чаштар, бистер, шагда өскен, ам бо хүнде
Шагжаң туман аравысты көжегелээн...
Сактыышкынның ээн калбас өртээли дег,
Чаңгыс-Дыдым, бисти харап турганзыг сен.
Ёндан БУЯН.
Апрель, 2023 ч.
“Шын” №39 2024 чылдың май 29