• Юрий КУУЛАР
(“Чайгы шүлүктер” деп шүлүктер бөлүүнден)
ЧАГАА
Чоруй барган хүнүӊден бээр үр-ле болдуӊ.
Чоктанчыыӊны чүгле хатка сөглеп чордум…
Черде-дээрде кайдаӊны-даа билбес бодум
Сенче черле чагаа бижиир бодай бердим…
Кайда чор сен, кандыг чор сен, күжүр эжим?
Кайгавас мен, Дыважаӊда барган боор сен…
Карак-биле барып көрүп чораан эвес,
Кайгамчыктыг оран дижир, ындыг-дыр бе?
Сансараныӊ дээрбези бар оран дижик…
Салым-чолуӊ чаарты долгап бербеди бе?
Харжыгаш бооп, чаъс болуп хуулдуӊ бе?
Катап база өдээӊ эргип келбедиӊ бе?
Сен-мен кылдыр олуртканыӊ ийи-ле дөс
Чечээ саглаӊ яблоняӊ саарзыкталган,
Бирээзиниӊ чартыы база шагда каткан,
Бижииргээн дег ыыт чогун эскердиӊ бе?
Сарыг-шокар өртемчейде менде чүү боор…
Чартык чүрээм шаа-биле соп-ла чоруур…
Сарыг бүрү тоглаан өйде – орай күзүн
Шапкыланы бээрин санга албас болза…
Чажыргаш чоор, амыдырал доктаар эвес,
Чаным орта чараш кыстар кээп чорду…
Чажы узун… чаагы долбаӊ…ынчалза-даа
Чаӊы сен дег чаражы мээ душпайн барды.
Буруузунган сеӊээ чагаам дооспайн бардым…
Будуун булгай карак чажы дүжүп каапты…
Чагаа сенче чедирип бээр улаачы чок…
Чалбыыш-оттуӊ чемижи бооп хып-ла калды…
Август 14. 2025.
ЧАЪСКА СЫЛДАП
(кыдат шүлүкчү Лу Бонуӊ аяны-биле)
Чайныӊ изии шаа төнүп адакталган…
Салгын эстеп чаным-биле эрте дүштү…
Шалырааш хем аайында шулурады…
Чаашкын кээп, дүннү өттүр ыглап хонду.
Чалыы үем көзү артып калган ышкаш…
Сарыым уруг чаным-биле эрткен ышкаш…
Чазырадыр хөөрепкеш барган ышкаш…
Чаъска сылдап, караам чодуп алдым ышкаш.
Август 2. 2026.
“ЧЕТТИРДИМ” ДЕП
СЫМЫРАНДЫМ
(Р.Ч. Иргитке сеткилимден)
Чайгы ышкам дыкпыжынга удуп чадап,
Чаныӊда мен даӊны атсы ыыт чок ор мен.
Чаъстап чадаан шак бо дүне дээр ышкаш
Сагыш саргыын сеӊээ үндүр сөглекседим…
Хүннү бадыр аштаттынып-чүлгүттүнүп
Күдүжеӊнээш, могап-шылап калган боор сен,
Күжүр эжим, удуп чыда хүлүмзүрдүӊ,
Күзелдериӊ дүште оода бүткен-даа ышкаш…
Чаӊгыс омааш кежик-чол-даа ааска өй,
Шала бөдүүн чуртталгавыс мындыг-ла-дыр…
Саазынга бижигилээр шүлүүм ышкаш
Чараш дүжүӊ үзе кирбээйн, дыштан, эжим.
Бүдер-бүтпес көвей чүве аазаваан мен,
Бүдүжүмнүӊ шаа ол ышкаш, күжүр эжим,
Бүзүрелиӊ кагбайн деткип чорууруӊ дээш,
Бүдүү сеӊээ “Четтирдим” деп сымырандым…
Июль 2. 2026.
Кызыл.
Чурукту qoodfon.ru-дан хоолгалаан.
“Шын” №36 2026 чылдың сентябрь 17
"Шын" солуннуң МАХ-каналынга каттыжыңар: max.ru/channel_shyn