Шөлээниӊ орнунга компенсация акша бээр.

Айтырыг ̶ харыы
«Удавас бо чыл төнер, чедир албаан шөлээм хонуктары бар, ону канчаар болзумза экил» деп айтырыгга Күш-ажыл яамызыныӊ специалистери харыылаан.

Ажылдакчы бүрүзү төлевирлиг шөлээ алыр эргелиг. Кол шөлээ дээрге календарьныӊ 28 хонук, а кадыынга хоралыг (азы) айыылдыг байдалдарда ажылдап турар болза, кол шөлээзи 35 хонук болур. Шөлээниӊ оон хөй хонуктарын хоойлужудулганыӊ негелдези-биле азы коллективтиӊ дугуржуп алгаш, тургузуп алган керээзи-биле доктаадып каан бооп болур.

Шөлээзин чылдырып ап болур. Чартык чыл болгаш-ла, үзүктеп ап болур. Ажыл берикчизи чыл санында ээлчеглиг шөлээни ажылдакчы бүрүзүнге бээр ужурлуг. Ийи чыл улаштыр шөлээлетпес, шөлээже салбас деп чүве турбас.

Шөлээзиниӊ хонуктары 28-тен көвей болза, 28 хонук иштинде дыштанып алгаш, арткан хүннериниӊ орнунга компенсация акша бээр дугайында билдириишкин бижиир.

Компенсацияныӊ хемчээлин санаары шөлээ акшазын санаары-биле дөмей. Ажылдакчыныӊ хүнде ортумак шалыӊ акшазын, шөлээзиниӊ ажыглаттынмаан хүннерин барымдаалаар.

Шөлээниӊ кол кезээ – календарьныӊ 28 хонуунга компенсация берип болбас. Кадыкшылга хоралыг ажыл кылып турар болза, немей алыр 7 хонук шөлээзиниӊ орнунга база компенсация бербес.
Сааттыг херээжен улус болгаш 18 хар четпээн ажылдакчылар шөлээзин долузу-биле ажыглаар.

Бир эвес ажылындан үнүп турар болза, ажыглаваан шөлээзиниӊ хонуктарыныӊ орнунга компенсация акшаны ап болур.
Кол шөлээзи дээрге календарьныӊ 28 хонуу, а кадыынга хоралыг (азы) айыылдыг байдалдарда ажылдап турар болза, кол шөлээзи 35 хонук болур. Ынчангаш шөлээзиниӊ оон хөй хонуктарыныӊ орнунга компенсация акша алырда, албан билдириишкин бижиир.
Тываныӊ Күш-ажыл яамызыныӊ медээзи-биле Р.Демчик белеткээн.