Тывада Шагаа бүдүүзүнүң улуг хемчээлдиг гуманитарлыг ачы-дуза чыылдазы доозулган. Февраль 10-да Кызылдан гуманитарлыг чүък сөөрткен дөрт улуг машина тускай шериг операциязының девискээринде дайынчыларывыска Шагаа уткуштур белекти сөңнээри-биле үнүпкен.
Бо удаада база албан черлеринден эгелээш, өг-бүлелерге чедир Тываның бүгү чону демин каттыштырып, 50 тонна чүъктү чыып белеткээн. Чүъктүң хөй кезии чагыг ёзугаар чыгдынган. Ында дайынчыларга аъш-чемден аңгыда, чугула дериг-херекселдер база кирип турар.
ТШО эгелээн чылдан тура ТывКУ деткимчезин үргүлчү көргүзүп келген. Бо удаада Ректор балындан чыгдынган 100 муң рубль-биле дайынчыларның чагыглары ёзугаар чугула чүүлдерни садып белеткээш, демин каткан.
Мурнуку одуругда ок-чепсек туткан дайынчылардан аңгыда, тырттырар камера-биле ажылдап турар улуска база деткимчени кылган. Хууда сайгарлыкчы Э.С. Лифанова дайынчы корреспондент Сайгын Бюрбюге техниктиг комплект — электри генератору, экшн-камера, ийи портативтиг рация, штатив, микрофоннар болгаш өске-даа чүүлдерни дамчыдып берген.
Сукпактың агролицейиниң бешки классчыларының дамчыткан үлүг-хуузун демдеглевес аргажок. Уруглар дайынчыларга чагааларны бижээш, боттарының карман акшазын чыып тургаш, рацияны белекке берген.
Шагаа уткуштур гуманитарлыг чүъкте 9 тоннадан хөй чаа доңурган эът, ак чем, 3 автомашина, 15 мотоцикл, он-он генераторлар, чылыг үрдүрер пушкалар, 100 ажыг камгалал четкилер, эмнер дээш оон-даа өске чугула херек чүүлдер кирген.
Кызылдан 20 тоннаның ийи улуг чүък машиназы биле беш тонна эът чүдүрген соодукчулуг машина Донецкиже, база бир соодукчулуг машина Курскуже углай үнүпкен.
Неделя дургузунда муң-муң километр узун орукту эрткеш, Тываның чонунуң арыг сеткили сиңген Шагаа сөңү дайынчыларга чедер. Гуманитарлыг ачы-дуза чедирилгези эрес-дидим дайынчыларывыстың сагыш-сеткилин чылдып, тиилелгеже чүткүлдү күштелдирер дээрзинге бүгү чон идегеп турар.
Карина МОНГУШ.
Гюзель КУНЗЕТТИҢ тырттырган чуруу.
“Шын” №5 2026 чылдың февраль 12